Home

ፖስታ ዜናዎች

Print
Category: Postal News
Published Date Written by Administrator
                 
              

የጥቅል ፖስታ ዲፓርትመንት የማሻሸያ ስራዎችን እየሰራ ነው

                           ••••••••

የጥቅል ፖስታ ዲፓርትመንት የማሻሻያ ስራዎችን እየሰራ መሆኑ ተገለፀ፡፡

ዲፓርትመንቱ በአሰራሩ ላይ የሚታዩ ክፍተቶችን በመለየት ለሰራተኞች እና ለደንበኞች ምቹ ከባቢን መፍጠር፣ የስራ ቅልጥፍና እና ጥራትን መጨመር ችሏል፡፡

ለደንበኞች በተለያዩ ምክንያቶች ሳይታደሉ ቀርተው ጊዜ ያለፈባቸው፣ ለላኪው ሀገር ተመላሽ ሳይደረጉ የቀሩና አባንደንድ የሆኑ መልእክቶች አስፈላጊውን የማጣራት ስራ በመስራት ለንብረት አስተዳደር በማስረከብ ተከማችተው የነበሩባቸውን ክፍሎች ለሥራ ምቹ እንዲሆኑ ተደርጓል፡፡

       በትግራይ ክልል በተከሰተው የሰላም አለመረጋጋት ምክንያት የተጠራቀሙ መልእክቶችንም ወደ መቀሌ እና አላማጣ በራስ ትራንስፖርት በማጓጓዝ ለደንበኞች እንዲታደሉ ተደርጓል፡፡

     ከመልዕክት ፍጥነት ጋር በተያያዘም አዲስ በተጀመረው የጉሙሩክ ሲስተም አማካኝነት መልእክቶችን በሲስተሙ ቀድሞ በመከታተል እና አስፈላጊውን ዝግጅት በማድረግ በፍጥነት እቃው ከጉሙሩክ እንዲወጣና ለደንበኞች እንዲሰራጭ እየተደረገ ይገኛል፡፡

ከዚህ በተጨማሪ ጥራትን መቆጣጠር የሚያስችሉ ሲስተሞችን በመጠቀም በስራው ላይ መሻሻሎች እየታዩ መሆናቸው ተገልጿል፡፡

በዚህም መጪ እና ሂያጅ መልዕክት በአንድ ፖስታ ቤት ይዞታ ከዚህ ቀደም ከአምስት እስከ ሰባት ቀን ይቆይ የነበረ ሲሆን በአሁን ጊዜ አንድ ቀን ተኩል ብቻ እንዲቆይ ማድረግ መቻሉ ተገልጿል፡፡

ከዚህ በተጨማሪ ጥራቱን እያሻሻለ በመምጣቱም በአለም ፖስታ ህብረት የጥራት መመዘኛ ሲስተም መሻሻሎች እያሳየ መምጣቱ ተጠቁሟል፡፡

የኢትዮጵያ ፖስታ አገራዊ ሃላፊነቱን እየተወጣ ነው
                                  ••••••••••••••••
የኢትዮጵያ ፖስታ እና ብሄራዊ ምርጫ ቦርድ አገራዊ ምርጫው በስኬት እንዲጠናቀቅ በጋራ እየሰሩ እንደሚገኙ የፖስታ ቢዝነስ ዘርፍ ምክትል ዋና ስራ አስፈፃሚ አቶ ኤፍሬም አበራ ገለፁ፡፡
ይኸውም ድርጅቱ ከብሔራዊ ምርጫ ቦርድ ጋር በተዋዋለው ውል መሰረት ዐይነታቸው ስምንት የሆኑ ለምርጫ ሂደቱ ጠቃሚ ቁሳቁሶችን በመላ ሀገሪቱ በሚገኙ 50 የምርጫ ጣቢያዎች እንዲደርስ በጥራት የማሸግ ስራ ሃላፊነትን በመውሰድ እየሰራ ይገኛል፡፡
እንደ አቶ ኤፍሬም ገለፃ ድርጅቱ ይህንን ስራ እያከናወነ የሚገኘው ቁሳቁሶቹ በሚገኙበት በአየር መንገድ ካርጐ ተርሚናል እና በኤግዚብሽን ማዕከል ሲሆን በቀን እስከ 3,000ሺህ ሳጥኖች ለምርጫው የሚያስፈልጉ ስምንት ቁሳቁሶች በየሣጥኑ መካተታቸውን በማጣራት የማሸጉ ስራ እየተሰራ ነው፡፡
የኢትዮጵያ ፖስታ እንደ መንግስት የልማት ድርጅት ምርጫው ሰላማዊ በሆነ መንገድ እና ያለምንም እንከን እንዲከናወን ድርጅቱ ባለው ጠንካራ እምነትና አቋም ይህንን ስራ መስራት እንደተቻ በመግለፅ ድርጅቱም የተጣለበትን ትልቅ አገራዊ ሃላፊነትም በእምነት እንደሚወጣ አቶ ኤፍሬም አረጋግጠዋል፡፡
                      የፖስታ ኦፕሬሽን የማሻሻያ ስራዎችን እየሰራ ነው
                               ••••••••••••••••••
የፖስታ ኦፕሬሽን ዘርፍ በመልዕክት ልውውጥ እና ጥራት ላይ ለውጥ ለማምጣት የአጭር ጊዜ እቅድ አውጥቶ እየሰራ እንደሆነ አስታወቀ፡፡
የፖስታ ኦፕሬሽን ዘርፍ ም/ዋ/ሥራ አስፈፃሚ አቶ ዳግማዊ ኃይልዬ እንደተናገሩት ከዚህ ቀደም የአገር ውስጥ መልዕክቶች ከመልዕክት ክፍል ከወጡ እና ለአመላላሽ ድርጅቶች ከተላለፉ በኋላ ምንም አይነት የመልዕክት ልውውጥ በአዳዩ እና በተቀባዩ ፖስታ ቤት መካከል የማይደረግ በመሆኑ በአሰራሩ ላይ ክፍተት ፈጥሯል፡፡
በዚህም መሰረት መልዕክቶች ከአዳይ ፖስታ ቤት ከወጡ እና በአመላላሽ ድርጅቶች ከተጫኑ በኋላ ተቀባይ ፖስታ ቤት መረጃ እንዲደርሰው ለማድረግ እየተሰራ እንደሆነ ገልፀዋል፡፡
የሞተረኞች ስምሪት ዕደላና ቅበላን በተመለከተ በተለያዩ የስራክፍሎች በየራሳቸው ስምሪቱን ተግባራዊ በማድረጋቸው የመልዕክት ጥራት ላይ ከፍተኛ ክፍተት ፈጥሯል፡፡
በመሆኑም አዲስ የሞተረኛ ስምሪት ተግባራዊ በማድረግ አገልግሎቱን የተሻለ ለማድረግ እየተሰራ መሆኑ ም/ዋ/ሥራ አስፈፃሚው ገልፀዋል፡፡

ኢ.ኤም.ኤስ የማሻሻያ ስራዎችን እየሰራ ነው

••••••••

     የኢ.ኤም.ኤስ ዲፓርትመንት የአገልግሎት አሰጣጡን ቀልጣፋ ለማድረግ በመመሪያዎች የታገዘ ስራ እየሰራ መሆኑ ተገለፀ፡፡

     በዲፓርትመንቱ ሥር የሚገኙት የፓስፖርት እደላ እና የባንኮች ክፍሎች የሚሰጧቸው አገልግሎቶች ግልጽ የሆነ አሰራር እንዲኖራቸው የውስጥ አሰራሩ መሻሻሉ ተገልጿል፡፡

   በፓስፖርት እደላ ክፍል የሂሳብ አሰራሩ ግልጽ እና ተጠያቂነት ባለው መልኩ እንዲከናወን አሰራሩን አስተካክሏል፡፡

ከዚህ ቀደምም ሳይታደሉ የቀሩ 5,699 ፓስፖርቶች ለኢምግሬሽን ዜግነትና ወሣኝ ኩነት ኤጀንሲ ተመላሽ እንዲሆኑ ተደርጓል፡፡

     በባንኮች ክፍል ለሞተሮች የሚወጣው የነዳጅ፣ የዘይት እና የጥገና ወጪዎች ወጥ የሆነ አሠራር የሌለው በመሆኑ የአሰራር ክፍተቶች በመስተዋላቸው፤ ይህን ለማስተካከል እየተሰራ እንደሚገኝ የዲፓርትመንቱ ተ/ቺፍ ኦፊሰር አቶ አባይነህ ተገኘ ገልጸዋል፡፡

     ከዚህ ቀደም በነበረው አሰራር የተጠራቀሙ መልዕክቶች የሚወገዱት በተለምዶ በመሆኑ የአሰራር መጓተትን ሲያስከትል ቆይቷል፤ ይህን ለማስተካከል የፖስታ አሰራር ህግን በመተግበር እየተሰራ ይገኛል፡፡

በሌላ በኩል ደግሞ ከኢ.ኤም.ኤስ መልዕክት ሥራ ጋር በተያያዘ የጉምሩክ ሲስተም ላይ የእያንዳንዱ መልዕክት ዓይነት በዝርዝር እንዲሰፍር፣ የተገዛበት ዋጋ እንዲፃፍ፣ እና ኪሎው ግልጽ በሆነ መልኩ እንዲቀመጥ በማድረግ በእደላ ጊዜ የሚያጋጥሙ ችግሮችን በመቅረፍ፣ ከዚህ በፊት የነበረውን የስራ መጓተት ለማስቀረት ጥረት እየተደረገ ይገኛል፡፡

የደንበኞች አገልግሎት ደንበኛ ተኮር ስራ እየሰራ ነው

••••••••

     የደንበኞች አገልግሎት ከደንበኞች ለሚቀርቡ ጥያቄዎች ፈጣን ምላሽ ለመስጠት የሚያስችሉ አሰራሮችን መቅረፁን አስታወቀ፡፡

   ለደንበኞች ፈጣን ምላሽ ለመስጠት በአካል ቅሬታ አቅራቢ ደንበኞችን ብቻ የሚያስተናግድ ሰራተኛ በመመደብ ቅደም ተከተላቸውን በመጠበቅ እንዲስተናገዱ እየተደረገ ይገኛል፡፡

   ከዚህ በተጨማሪ ከደንበኞች የሚቀርቡ የቅሬታ ደብዳቤዎችን በማየት እና ያለውን ችግር በመለየት የሚያጣሩ ሶስት ሰራተኞችን በመመደብ ያለውን የስራ መጓተት ለመቅረፍ መቻሉም ተገልጿል፡፡

     በሪጅን እና በዞኖች ስር ካሉ ፖ/ቤቶች የሚቀርብ የደንበኞች ቅሬታን በተመለከተ ከሪጅኖችና ዞኖች ደንበኞች ክፍያ የፈፀሙበትን ደረሰኝና የመታወቂያ ኮፒ ከሞሉት ፎርም ጋር በማያያዝና ወደዋናው መ/ቤት በመላክ ቅሬታቸው በፍጥነት ምላሽ እንዲያገኝ እየተሰራ ነው፡፡

የህይወት እና የአደጋ ጊዜ ዋስትና ውል ታሰረ

••••••••

     ለ 96 ሰራተኞች ከኢትዮጵያ መድን ድርጅት የህይወት እና የአደጋ ጊዜ ኢንሹራንስ ዋስትና ውል ታሰረ፡፡

   በዋስትናውም ሞተር ሳይክል አሽከርካሪዎች፣ የጥገና ሰራተኞች፣ ሹፌሮች እና መካኒኮች የስራ ሁኔታቸው ለአደጋ ተጋላጭ በመሆኑ አዲስ የውል ስምምነት በማድረግ የኢንሹራንስ አገልግሎት እንዲያገኙ ተደርጓል፡፡

   ድርጅቱ ሰራተኞች አደጋ ቢያጋጥማቸው እንደ አደጋው ሁኔታ በህብረት ስምምነቱ መሰረት ክፍያ ይፈጽማል፡፡ በአደጋ ምክንያት በሞት ለተለዩ ሰራተኞችም የአንድ ዓመት ደሞዝ ለወራሽ እንደሚከፈልም ተገልጿል፡፡    

የERP ሲስተም ተግባር ላይ ዋለ

   የኢትዮጵያ ፖስታ አገልግሎት ላለፉት አመታት ተግባር ላይ ለማዋል ሲሰራ የነበረውን የ ERP ሶፍትዌር ትግበራ ስራ ላይ አውሏል፡፡

   ድርጅቱ የፋይናንስ፣ የሰው ሀብት እና የንብረት አስተዳደሩን በዘመናዊ አሰራር ለመተካት በርካታ ተግባራትን ሲያከናውን ቆይቷል፡፡

   ላለፉት ጊዜያት የሰራተኞች፣ የሀብት እና የፋይናንስ መረጃዎች ወደ ሲስተሙ ሲገባ የቆየ ሲሆን በዚህ ወር መጀመሪያ ላይ ወደ ትግበራ ገብቷል፡፡

ሲስተሙ በንብረት አስተዳደር በኩል የድርጅቱን ንብረት የሚያሣውቅ፣ ግዢን እና ስርጭትን የሚከታተል ሲሆን ከሰው ሀብት አስተዳደር በኩልም ከቅጥር እስከ ስንብት ያሉትን ሂደቶች የሚከታተል፣ የሰራተኛውን ዝውውር፣ እድገት፣ የእረፍት ሁኔታ በዝርዝር የሚያሣይ ነው፡፡ ሲስተሙ የአላቂ እና የቋሚ ንብረቶችን ግዢ ይቆጣጠራል፣ የአገልግሎት ዘመን በየወሩ ይሰራል፣ ከዚያም አልፎ እስከማስወገድ ያሉትን ስርዓቶች ይከታተላል፡፡

   የድርጅቱ ሀብትን በተመለከተም በየወሩ የቆጠራ ስራ ያከናውናል፣ ከፋይናንስ አሰራሩ ጋር በተያያዘም በየአመቱ የፀደቀ በጀትን ሲስተሙ ላይ በመጫን በበጀቱ መሰረት ስራዎች እንዲከናወኑ የወጪ ቁጥጥር ያደርጋል፡፡ እንዲሁም ስራዎች በተያዘላቸው በጀት ብቻ እንዲከናወኑ ያደርጋል፤ በፀደቀው በጀት መሰረትም እያንዳንዱን ወጪ ይቆጣጠራል፣ ትርፍንም በየወሩ ያሣውቃል፡፡ ከዚህ በተጨማሪ ለቀጣዩ ዓመት አስፈላጊ የሆነን በጀት ከባለፈው ዓመት አፈፃፀም በመነሣት ለቀጣይ የሚያስፈልገውን ያስቀምጣል፤ የአዋጪነት ትንተናም አዘጋጅቶ ያቀርባል፡፡

     ከሂሣብ አሰራር ጋር በተያያዘም የድርጅቱን የሀገር ውስጥ እና አለም አቀፍ ተሰብሣቢ ሂሣቦችን በሲስተሙ ውስጥ ሪከርድ አድርጐ ይይዛል፣ ተከፋይ ሂሣቦችንም ያሣውቃል፡፡

   ከዚህ በተጨማሪ በእያንዳንዱ ባንክ አካውንት ውስጥ ያለውን የድርጅቱን የፋይናንስ እንቅስቃሴ በሲስተም ሞጁል የቁጥጥር ስራም ያከናውናል፡፡

   ሲስተሙ ከፖስት ግሎባል አገልግሎት እና ከአለም አቀፍ ፖስታ ሲስተም ጋር እንዲጣመር ስለሚደረግ በየእለቱ ያሉትን የመልዕክቶች እንቅስቃሴ መዝግቦ ማስቀመጥ ይችላል፡፡

     ድርጅቱ ይህን ሲስተም ተግባራዊ በማድረግ ንብረቱን፣ ሂሣቡን እና የሰው ሀይሉን በአግባቡ መቆጣጠር እንዲችል ከመርዳቱ በተጨማሪ ከሰው ንክኪ ውጪ በሆነ መልኩ በየወሩ የሂሣብ መግለጫ ያዘጋጃል፡፡

   ከዚህ ቀደም አጠቃላይ 74 ሰራተኞች የ ERP ሞጁል ስልጠና የወሰዱ ሲሆን ወደ ተግባር ለመግባትም ለ12 ሰራተኞች የሙከራ ስልጠና ተሰጥቷል፡፡ በቀጣይም ለማኔጅመንት አባላት ስልጠና እንደሚሰጥ የፕሮጀክቱ ጽ/ቤት ተ/ሃላፊ አቶ ሱራፌል ምናለሸዋ ተናግረዋል፡፡

የኔትዎርክ ስራው ተጠናክሮ ቀጥሏል

     ድርጅቱ አገልግሎት አሰጣጡን በቴክኖሎጂ በመደገፍ የመልዕክት ደህንነት እና ፍጥነት እንዲሁም አስተማማኝነትን ለመጠበቅ በርካታ ተግባራትን እያከናወነ ይገኛል፡፡

     ከዚህ ውስጥም አንዱ ቦሌ ዓለም አቀፍ አውሮፕላን ማረፊያ የሚገኘውን የመልዕክት ልውውጥ ቢሮ በኔትዎርክ ማገናኘት ይገኝበታል፡፡ የኔትወርክ ዝርጋታውም የተጠናቀቀ ሲሆን አስፈላጊ ቁሣቁሶች ሲሟሉ በጥቂት ቀናት ውስጥ ወደ ስራ ይገባል፡፡

     የመልዕክት ልውውጥ ቢሮው በቴክኖሎጂ የተደገፈ አገልግሎት መስጠት ሲጀምር ማንኛውም መልዕክት ኢትዮጵያ ሲገባ እና ከኢትዮጵያ ሲወጣ የድርጅቱ ደንበኞች ስለላኩት መልዕክት በቂ መረጃ በሲስተሙ አማካኝነት እንዲኖራቸው ይረዳል፡፡

   ቀደም ሲል በነበረው አሰራር መልዕክቶች ወደ ሀገር ውስጥ ከገቡ በኋላ ወደ ጉሙሩክ ተላልፈው ለፍተሻ በሚቆዩበት ጊዜ መልዕክቶቹ ወደ ሀገር ውስጥ መግባታቸው እና በማን እጅ ላይ እንደሚገኙ ምንም አይነት መረጃ ደንበኞች ማግኘት የማይችሉበት ሁኔታ ነበር፡፡ በቀጣይ ሱስተሙ ስራ ላይ ሲውል መሰል ክፍተቶችን በማስቀረት የደንበኞችን እርካታ እንደሚጨምር ተገልጿል፡፡

ለተፈናቀሉ ወገኖች እርዳታ ተሰጠ

   የኢትዮጵያ ፖስታ አገልግሎት ድርጅት እና ሰራተኞች በቤንሻንጉል ጉሙዝ ክልል በመተከል ዞን ለተፈናቀሉ ወገኖች እርዳታ ሰጡ፡፡

     የድርጅቱ ሰራተኞች የተለያዩ አልባሣት ለድርጅቱ እርዳታ አሰባሣቢ ኮሚቴ ያበረከቱ ሲሆን፤ ድርጅቱም ግምቱ ከ650,000.00/ስድስት መቶ ሃምሳ ሺ ብር/ በላይ የሆነ አልባሣት እና መገልገያ ቁሣቁሶች እንዲሁም ተጨማሪ ብር 100,000.00/አንድ መቶ ሺህ ብር/ በብሄራዊ ደረጃ ለተቋቋመው እርዳታ አሰባሳቢ ኮሚቴ እርዳታውን ለግሷል፡፡

     ድርጅቱ ማህበራዊ ሃላፊነቱን በመወጣት በተለያዩ ጊዜያት የወገን አለኝታነቱን ያሣየ ሲሆን ከዚህ ቀደም በሀገራችን በአጋጠሙት ሰው ሰራሽ ቀውሶች እና ተፈጥሮ አደጋዎች ለተጐዱ እና ለተፈናቀሉ ወገኖች የበኩሉን አስተዋጽኦ ሲያደርግ መቆየቱ ይታወሣል፡፡

የስድስት ወር የእቅድ አፈፃፀም ግምገማ ተካሄደ

         ኢትዮጵያ ፖስታ አገልግሎት ድርጅት የ2013 ዓ.ም በጀት ዓመት የመጀመሪያ ስድስት ወር የእቅድ አፈፃፀም ግምገማ የካቲት 6 ቀን 2013 ዓ.ም በኢንተርኮንትኔንታል ሆቴል አካሄደ፡፡

       የድርጅቱ የስድስት ወር የእቅድ አፈፃፀም ሪፖርት በእቅድና የለዉጥ ስራዎች ዲፓርትመንት ቺፍ ኦፊሰር ወ/ሮ ዘቢደር ታምሩ የቀረበ ሲሆን ድርጅቱ በበጀት ዓመቱ የመጀመሪያ ስድስት ወራት ከጠቅላላ የመልዕክት ትራፊክ መጠን 4,027,763 ውስጥ በደብዳቤ ከዕቅዱ 48% በጥቅል መልዕክት ከዕቅዱ 77% ከፈጣን መልዕክት /ኢ.ኤም.ኤስ/ ከዕቅዱ 62% ማሳካት መቻሉ ተገልጿል፡፡ የፋይናንስ አፈፃፀሙን በተመለከተ በስድስት ወር ለመሰብሰብ ከታቀደው 91.2% በማሳካት የላቀ ውጤት ማስመዝገብ መቻሉ ተገልጿል፡፡

     በድርጅቱ የሚገኙ የማኔጅመንት አባላት፣ የሪጅን እና የዞን ሃላፊዎች ስብሰባውን የተሳተፉ ሲሆን በተለይ ከሪጅን እና ከዞን ሃላፊዎች ጋር የበጀት ዓመቱ የመጀመሪያው ስብሰባ በመሆኑ ያላቸውን ጠንካራና ደካማ ጐኖች በማንሳት ግምገማው ተካሂዷል፡፡    

   ከዚህ በተጨማሪም የድርጅቱ የኦፕሬሽን ተ/ምክትል ስራ አስፈፃሚ፣ የፖስታ ቢዝነስ ዘርፍ ምክትል ስራ አስፈፃሚና የሰው ሀብት ዘርፍ ምክትል ስራ አስፈፃሚ በኦፕሬሽኑ ዙሪያ፣ በሰው ሀብት አጠቃቀምና ገበያን በማፈላለግ ቋሚ ደንበኞችን ከማፍራት አኳያ በሪጅንና ዞን ፖ/ቤቶች መሰራት ያለባቸው ተግባራት በተመለከተ አቅጣጫ ተሰጥቷል፡፡

   በመጨረሻም የድርጅቱ ዋና ስራ አስፈፃሚ ወ/ሮ ሐና አርአያስላሴ በስድስት ወር አፈፃፀማቸው ዝቅ ያሉ ሪጅኖች፣ እና ዞኖች የማካካሻ መርሃ ግብር በማውጣት እስከ መጋቢት 30 እንዲጠናቀቅ መመሪያ ያስተላለፉ ሲሆን በቀጣይም የተሻለ አፈፃፀም እንዲኖር ተግቶ መስራት እንደሚያስፈልግም አሳስበዋል፡፡

የመንገድ ፈንድ ክፍያን አስመልክቶ የሶስትዮሽ ስምምነት ተካሄደ

   በክብደት ላይ የተመሰረተን አመታዊ የተሽከርካሪዎች ፈቃድ ማደሻ ክፍያን አስመልክቶ በኢትዮጵያ ፖስታ አገልግሎት ድርጅት፣ በኢትዮጵያ ንግድ ባንክ እና በኢትዮጵያ የመንገድ ፈንድ ጽ/ቤት መካከል በጋራ ለመስራት የሶስትዮሽ ስምምነት ተደረገ፡፡

በስምምነቱ ሰነድ ላይ አቶ ረሺድ መሀመድ የመንገድ ፈንድ ፅ/ቤት ሀላፊ፣ አቶ ኪዳኔ መንገሻ የኢትዮጵያ ንግድ ባንክ የማዕከላዊ ሪጂን ም/ፕሬዝዳንት ፊርማቸውን አኑረዋል፡፡

     በስምምነቱ መሰረት የተሽከርካሪ ባለቤቶች በኢትዮጵያ ንግድ ባንክ ቅርንጫፎች ፖስ/pos/ ማሽኖች እንዲሁም በኢንተርኔት ባንኪንግ ክፍያቸውን መፈፀም የሚችሉበት አሰራር ተቀይሷል፡፡

   ከባንክ በተጨማሪ በኢትዮጵያ ፖስታ አገልግሎት ድርጅት በሚገኙ የፖስ ማሽኖች አማካኝነት መፈፀም ይቻላል፡፡

   ባለንብረቶች በተጠቀሱት ሶስት መንገዶች ክፍያቸውን ከፈፀሙ በኋላ ማህተም ያለበት ደረሰኝ እና የተሽከርካሪውን ሊብሬ በመያዝ ወደ ኢትዮጵያ ፖስታ አገልግሎት ድርጅት በመምጣት ክፍያውን በማረጋገጥ የቦሎ ስቲከር እና የክፍያ ማረጋገጫ ደረሰኝ ይቀበላሉ፡፡

   ከፋዩ የቦሎ ስቲከር እና የክፍያ ማረጋገጫ ከፖስታ ቤት ከተቀበለ በኋላ ለትራንስፖርት ባለስልጣን ደረሰኙን በማሣየት ዓመታዊ ቦሎ መውሰድ እንደሚቻል ስምምነቱ ያስረዳል፡፡

   ስምምነቱ ሀሰተኛ ሰነድ ጋር በተያያዘ ለመንግስት ገቢ መሆን የሚገባው ገንዘብ ገቢ እየሆነ ያልነበረበትን የተጭበረበረ አሰራር ለማስቀረት ታስቦ የተፈፀመ ሲሆን ገቢውን ቀጥታ ወደ መንገድ ፈንድ አካውንት እንዲገባ ያደርጋል፡፡

   ከዚህ በተጨማሪ በእጅ ለእጅ የገንዘብ ልውውጥን በመቀነስ ረገድ ውጤታማ አሰራርን ለመዘርጋት ይረዳል፣ ክፍያው በሚፈፀምበት ወቅት የሚያጋጥም የሰነድ ማጭበርበርን እና ሕገ-ወጥ አሰራርን ይከላከላል፡፡ 

የአፍሪካ ፖስታ ቀን ታስቦ ዋለ

   “በችግር ጊዜ አስተማማኝነትን መገንባት” በሚል መሪ ቃል የመላው አፍሪካ ፖስታ ህብረት ቀን በታንዛኒያ አሩሻ ታስቦ ውሏል፡፡

   ዕለቱ ኮቪድ 19 ወረርሽኝ በፈጠረው ስጋት መሰረት በአባል ሀገራቱ መካከል የቪዲዮ ኮንፈረንስ በማካሄድ ተከብሯል፡፡

     ውይይቱ በኮቪድ 19 ወቅት እና በቀጣይ በመላው አፍሪካ ስለሚኖረው የገንዘብ ማስተላለፍ ተግባር በተመለከተ ሲሆን የህብረቱ አባል ሀገራት በሙሉ በስብሰባው እንዲሣተፉ ጥሪ ቀርቧል፡፡

     ዕለቱን በማስመልከት የህብረቱ ሊቀመንበር ሚስተር የኑስ ጂብሪን ባስተላለፉት መልዕክት አለማችን እ.ኤ.አ ከ1930 ወዲህ አይታው በማታውቀው ችግር ውስጥ በመውደቋ በርካታ ውጥንቅጦች ውስጥ ገብታለች፣ በርካቶችንም አጥታለች፡፡

የአፍሪካ ፖስታ ህብረት ኮቪድ 19 በተለይ በአፍሪካ ላይ ያስከተለውን ተጽዕኖ በጥልቀት መገምገሙን ገልፀዋል፡፡ በተገኘውም ውጤት መሰረት የፖስታው ሴክተር በአጠቃላይ እንዲሁም የፖስታ አስተዳደሮች በተናጠል በስራዎቻቸው ላይ አስከፊ ውጤት የሚያስከትሉ ተግዳሮቶች አጋጥመዋቸዋል፡፡ ይህ ያልተገመተው ሁኔታ አየር መንገዶች ጉዟቸውን እንዲያቋርጡ፣ ሀገራት ክልላቸውን እንዲዘጉ፣ የእንቅስቃሴ ገደቦች እንዲጣሉ ተደርጓል፣ በተለያየ መስኩም የህዝቦች የፍላጐት መጠን መጨመር የዕቃዎች ዋጋ ንረት እና የመሣሰሉት ነገሮች አስከትሏል፡፡

     በዚህም የመጪ እና የወጪ መልዕክቶችን መጠን መቀነስ፣ የደንበኞች ወደ ፖስታ ቤት የመምጣት ፍላጐት ማነስ፣ የሽያጭ መጠኖች በተለያዩ ቦታዎች መቀነስ፣ የደንበኞች ቅሬታ መብዛት ከብዙ በጥቂቱ የሚጠቀሱ ችግሮች እንደሆኑ ገልፀዋል፡፡

     የህብረቱ አባል ሀገራት፣ የፖስታ አስተዳደር ሰራተኞች ራሣቸውን እና ቤተሰባቸውን ለወረርሽኝ አጋልጠው ስራቸውን በቆራጥነት ሲያከናውኑ መቆየታቸው እጅግ የሚያስመሰግን መሆኑን ጠቅሰው ወረርሽኙ ባስከተለው አሉታዊ ተጽዕኖ መልካም አጋጣሚዎችን በመፈለግ የፖስታው ዘርፍ መልዕክት ለማድረስ ያሣየው ተነሣሽነት እና ፈጠራ ወደፊትም መቀጠል እንደሚገባው ተናግረዋል፡፡

   ሁሉም የፖስታ አስተዳደር ከመሰል ችግሮች ራሣቸው ለማዳን የአጭር እና የረጅም ጊዜ እቅድ አውጥተው መንቀሳቀስ እንደሚገባቸው፣ ይህን ከባድ ጊዜ ኢንዱስትሪው በአሸናፊነት እንደሚያልፈው እምነታቸው እንደሆነ ገልፀዋል፡፡

     ህብረቱ የአፍሪካ ህዝቦች የጋራ ተጠቃሚነትን የሚያሣድጉበትን መንገድ ለመፈለግ እንደሚሰራ እንዲሁም አዲስ ለተቋቋመው የአፍሪካ አህጉር ነፃ ንግድ አካባቢን ለማጐልበት እንደሚተጋ ገልፀዋል፡፡

የፖስታ ኦፕሬሽን ስልጠና ተሰጠ

     በኢትዮጵያ ፖስታ አገልግሎት ድርጅት በአዲስ አበባ ከተማ ውስጥ ለሚገኙ 16 ሰራተኞች የፖስታ እና የሂሣብ አሰራር ስልጠና ሰጠ፡፡

     ድርጅቱ የሰራተኞች አቅም በመጨመር ስራዎች በጥራት እንዲከናወኑ እና የደንበኞች እርካታ እንዲጨምር በርካታ ተግባራት እያከናወነ የሚገኝ ሲሆን ስልጠና ክፍሉም ሰራተኞች ስራቸውን በእውቀት ላይ ተመስርተው መስራት የሚያስችሉ ስልጠናዎችን በመስጠት ላይ ይገኛል፡፡

     በመሆኑም አጠቃላይ ስለ ፖስታ ጽንሰ ሐሳብ፣ ስለጥቅል መልዕክት ቅበላና እና እደላ፣ ስለ ኢ.ኤም.ኤስ መልዕክት ቅበላና እና እደላ ስለ አደራ ደብዳቤዎች አሰራር፣ ስለመልዕክቶች አዘራዘር፣ ስለመልዕክት አዘገጃጀት፣ ጥቅል መልዕክቶችን ለመላክ ስለሚያስፈልጉ የተለያዩ ፎርሞች እና ሲስተሞች፣ ስለተለያዩ የፖስታ ኮዶች፣ ስለ እለታዊ እና ሣምንታዊ ሂሣብ አዘጋግ እንዲሁም ስለ ካንስሌሽን ትምህርቶች ተሰጥተዋል፡፡

የንብረት ማስወገድ ስራዎች ተከናወኑ

     በኢትዮጵያ ፖስታ አገልግሎት ድርጅት በተለያዩ ክፍሎች ተከማችተው የነበሩ ያገለገሉ ንብረቶች እና የቆዩ መልዕክቶች እንዲወገዱ ተደርጓል፡፡

   በድርጅቱ ለበርካታ ዓመታት ተቀምጠው የነበሩ ጐማዎች፣ ወረቀቶች፣ ጋዜጦች እንዲሁም የተለያዩ የህትመት ውጤቶች፣ ዶክመንቶች በጨረታ እንዲሁም በእርዳታ እንዲወገዱ ተደርጓል፡፡

   ግምቱ ወደ 30‚000 ብር የሚጠጋ 100 ሸራ መጠን ያለው የተለያዩ ወረቀቶች በአዳማ ከተማ ለሚገኝ ለሴቶች ልማት እድገት ያገለገሉ ዕቃዎች አስወጋጅ ድርጅት በእርዳታ መልክ ተሰጥቷል፡፡

     ድርጅቱ ለተለያዩ አገልግሎቶች ሲጠቀምባቸው የነበሩ ከ1‚020 ኪሎግራም በላይ ወረቀት፣ መጠናቸው 3‚580 ኪሎ ግራም በላይ የሆኑ ጋዜጦች በጨረታ እንዲወገዱ ተደርገዋል፡፡ ከዚህ በተጨማሪ የአገልግሎት ዘመናቸውን የጨረሱ የተለያዩ መጠን ያላቸው ወደ 400 የሚጠጉ ጐማዎችም በጨረታ ተሸጠዋል፡፡

   ድርጅቱ ለበርካታ አመታት ተቀምጠው የነበሩ ያገለገሉ ወረቀቶችን በእርዳታ መልክ በመስጠት እንዲሁም ለሽያጭ በማዋል ንብረቶቹን መጠቀም የቻለ ሲሆን፣ ያገለገሉት ንብረቶች ይዘውት የነበረውን ቦታም ለሌላ አገልግሎት ክፍት እንዲሆን ተደርጓል፡፡

   በአጠቃላይ ድርጅቱ ብር 216‚870መጠን ያላቸው ንብረቶች በስጦታ እና ጨረታ በማውጣት ከብክነት ማዳን መቻሉን የንብረት አስተዳደር ቺፍ ኦፊሰር አቶ ዳንኤል አበራ ገልፀዋል፡፡

ድርጅቱ ገቢውን የሚጨምሩ ተግባራትን እያከናወነ ይገኛል

     የኢትዮጵያ ፖስታ አገልግሎት ድርጅት ወጪዎችን በመቀነስ ገቢውን መጨመር የሚያስችሉ ስራዎች በመስራት ላይ ይገኛል፡፡

ከነዚህ ተግባራት ውስጥ አንዱ በተለያዩ ቦታዎች ተበታትነው የነበሩ ዲፓርትመንቶችን በአንድ አካባቢ በማሰባሰብ የተገኘውን ክፍት ቦታ ለሌሎች ተግባራት የማዋል ስራ ሲሆን በዚህም ወጪን እና ጉልበትን በመቀነስ የስራ ውጤታማነትን መጨመር መቻሉ ተገልጿል፡፡

     ከዚህ ቀደም በርካታ ክፍሎች በአንድ ዲፓርትመንት በመያዛቸው እንዲሁም ተበታትነው የነበሩ ዲፓርትመንቶች ወደ አንድ እንዲጠቃለሉ በመደረጋቸው ክፍሎቹን ወደ አንድ የመሰብሰብ ስራ እየተሰራ ሲሆን፤ በተለይ በኢትዮ ቴሌኮም ህንፃ ላይ የሚገኙ ዲፖርትመንቶችን ወደ ጠቅላይ ፖስታ ቤት ህንፃ ውስጥ፣ ጥቅል ዲፓርትመንት የሀላፊ፣ የፀሐፊ ቢሮ እና የደንበኞች አገልግሎት ቢሮ፣ አዲስ አበባ ዞን ወደ አራት ኪሎ ሲዘዋወር ወደተገኙ ክፍት ቦታዎች፣ እንዲሁም ፖስታ መደብር ዲፓርትመንት ይጠቀምባቸው የነበሩት ክፍሎች ክፍት በመሆናቸው ወደ እነዚህ ክፍት ቦታዎች የማዘዋወር ስራ እየተሰራ ይገኛል፡፡

      ከዚህ ቀደም ድርጅቱ አራት ኪሎ አካባቢ ወደ አሰራው አዲስ ህንፃ የተዘዋወሩ ዲፓርትመንቶች ወደ ዋናው መስሪያ ቤት የመመለስ ስራ ለመስራት ቅድመ ዝግጅት እየተደረገ ይገኛል፡፡

ከዚህ በተጨማሪ ቢሮዎች ዘመናዊ በሆነ መልኩ አገልግሎት መስጠት የሚችሉበትን እና ለሰራተኞች አመቺ የስራ ቦታ ለማመቻቸት በዋናው መ/ቤት ሶስተኛ ፎቅ የሚገኘው የማርኬቲንግ ዲፓርትመንት ቢሮን እንደ ሰርቶ ማሣያ በመጠቀም ክፍሉን በማስፋት የእድሣት ስራ እየተከናወነ ይገኛል፡፡

   ከዚሁ ጋር በተያያዘ የድርጅቱ የመኪና ማቆሚያ ስፍራን በአግባቡ መጠቀም እንዲቻል የታሪፍ ማስተካከያ እና የፓርኪንግ ሰራተኛ ቁጥር የመጨመር ስራ የተሰራ ሲሆን ፤ የመኪና ማቆሚያውንም የፓስታ አገልግሎት፣ የትራንስፖርት ሚኒስቴር እንዲሁም ለደንበኞች አስፈላጊ የሆኑ ቦታዎች ቁጥር የመወሰን ስራ ለመስራት በሚኒስቴር መስሪያቤቱና በድርጅቱ በኩልም መግባባት ላይ እንደተደረሰ ተገልጿል፡፡

የደንበኞች ውይይት በአዳማ ከተማ ተካሄደ

በአዳማ ከተማ ከአሰላ እና ከአዳማ ዞን ፖስታ ቤቶች ጽ/ቤት ደንበኞች ጋር በአዳማራስ ሆቴል ውይይት ተካሂዷል፡፡

     በውይይቱ መንግስታዊ ድርጅቶች፣ የግልተቋማት፣ የትራንስፖርት ድርጅቶች፣ የጤና ተቋማት እና ሌሎች ከድርጅቱ ጋር በቅርበት የሚሰሩ ደንበኞች ተካፋይ ሆነዋል፡፡

   የድርጅቱ የሩብ ዓመት ሪፖርት በወ/ሮ ዝይን ገድሉ የኮሙኒኬሽን እና ዓለም አቀፍ ግንኙነት ቺፍ ኦፊሰር የቀረበ ሲሆን፤ በሪፖርቱም የአገልግሎት ገጽታ ግንባታን በተመለከተ፣ የመልዕክት ትራፊክ መጠን ለመጨመር እየተሰሩ ያሉ ስራዎች፣ ድርጅቱ ቴክኖሎጂን ለማስፋፋት እየሰራ ያለው ስራ፣ ማህበራዊ ድጋፎችን በተመለከተ እንዲሁም ጥንካሬዎቹ እና እቅዱን ከማሣካት ረገድ የነበሩ ድክመቶች እና ችግሮች ቀርበዋል፡፡

     ደንበኞች በቀረቡት ሪፖርት ላይ እና በአገልግሎት አሰጣጡ ዙሪያ መስተካከል ስላለባቸው ጉዳዮች አስተያየታቸውን ሰጥተዋል፡፡

    በዚህም መሰረት የታሪፍ ጭማሪን በተመለከተ፣ የዱቤ አገልግሎት አሰጣጥን በተመለከተ፣ ከተማሪዎች ትራንስክሪፕት መላክ ጋር በተያያዘ ያሉ ክፍተቶች፣ የመልዕክቶች መዘግየት፣ አንድ ሰራተኛ ብቻ በሚገኝባቸው ፖስታ ቤቶች አገልግሎት በተፈለገው ጊዜ አለማግኘት፣ ከናሙና ማመላለስ ጋር በተያያዘ ክፍተት መኖሩ፣ የአዳማ ፓ/ቤት አገልግሎት መስጪያ ጠባብ መሆን፣ የፖስት ፋይናንስ ስራን ድርጅቱ በስፋት መስራት እንዳለበት፣ በዱቤ የተሰጡ አገልግሎቶች ሂሣብ በወቅቱ አለመሰብሰብ እና ሌሎች ገንቢ የሆኑ ሀሣቦች ተነስተዋል፡፡

   ለተነሱት ጥያቄዎች የፖስታ ኦፕሬሽን ዘርፍ ተ/ም/ዋ/ሥ/አስፈፃሚው አቶ በዛብህ አስፋው ማብራሪያ ሰጥቷል፡፡

የመንገድ ፈንድ ክፍያ የአከፋፈል ሥርዓት ተቀየረ

     የኢትዮጵያ ፖስታ አገልግሎት ድርጅት እና የኢትዮጵያ መንገድ ፈንድ ጽህፈት ቤት የጋራ ውል በመግባት አመታዊ በክብደት ላይ የተመሰረት የተሽከርካሪዎች ፈቃድ ማደሻ (መንገድ ፈንድ) ክፍያ በፖስታ ቤት በኩል ከግንቦት 2007 ዓ.ም ጀምሮ ሲሰበሰብ መቆየቱ ይታወሣል፡፡

     ድርጅቱ በአዲስ አበባ ውስጥ በሁሉም ክፍለ ከተሞች እና በተመረጡ ፖስታ ቤቶች እንዲሁም ከአዲስ አበባ ከተማ ውጪ በዞን ፖስታ ቤቶች ክፍያ ሲሰበሰብ ቆይቷል፡፡

   ከቅርብ ጊዜያት ወዲህ በተደረገ ማጣራት በተጭበረበረ ደረሰኝ ክፍያዎች እየተፈፀሙ መሆኑ ተደርሶበታል፡፡

   በዚህም ምክንያት አሰራር መቀየሩ አስፈላጊ መሆኑ በመታመኑ የአከፋፈል ስርዓቱ በቴክኖሎጂ የተደገፈ እንዲሆን ተደርጓል፡፡ የራሱ የሆነ ሲስተም በመቅረጽም ክፍያዎች በሲስተሙ እንዲፈፀሙ ተደርጓል፡፡

 በዚህም በአዲስ አበባ ከዋናው ፖ/ቤት ውጪ በ12 ፖስታ ቤቶች ሲስተሙ የተዘረጋ ሲሆን፤ በአስሩም ክፍለ ከተሞች ስራው ተጀምሯል፡፡ በርካታ ደንበኞች በሚበዛባቸው አራት ክፍለ ከተሞችም ተጨማሪ ካውንተር በመክፈት አገልግሎት መስጠት ተጀምሯል፡፡

   በቅርብ ጊዜያትም በአዲስ አበባ ዞን ፖ/ቤ ስር በሚገኙ ፖስታ ቤቶች አገልግሎቱን በስፋት መስጠት እንደሚጀመር ከፖስት ፋይናንስ ዲፖርትመንት የተገኘው መረጃ ያስረዳል፡፡

የኤች. አይ.ቪ ኤድስ ምርመራ እና የምክክር አገልግሎት ተደረገ

     በኢትዮጵያ ፖስታ አገልግሎት ድርጅት የጤና እና የሙያ ደህንነት ክፍል አዘጋጅነት ከዘውዲቱ ሆስፒታል ጋር በመተባበር ለድርጅቱ ሰራተኞች በፍቃደኝነት ላይ የተመሰረተ የኤች. አይ.ቪ. ኤድስ ምርመራና የምክክር አገልግሎት በዋናው መስሪያ ቤት ተሰጠ፡፡

     በሀገራችን በተለይ በከተሞች ደረጃ ስርጭቱ እየጨመረ ያለውን የኤች.አይ.ቪ ኤድስ ቫይረስ ግንዛቤ መፍጠር ያስችል ዘንድ እንዲሁም ራስን ማወቅ ለራስም ሆነ ለሌሎች ለመጠንቀቅ ስለሚረዳ በክፍሉ የኤች.አይ.ቪ. ኤድስ የምርመራና የምክክር አገልግሎት ለድርጅቱ ሰራተኞች ለመስጠት በ2013 ዓ.ም እቅድ በመያዝ ምርመራው መደረጉን የጤና እና የሙያ ደህንነት ክፍል ማናጀር ወ/ሮ የምስራች አያሌው ገልፀዋል፡፡ በተለይ በዋናው መስሪያ ቤት የሚገኙ ሰራተኞች ምርመራውን እንዲያደርጉ ቅስቀሣ በተለያየ መልኩ ሲደረግ እንደነበርና ሰራተኞችም የኤች.አይቪ. ኤድስና የምክክር አገልግሎት ተጠቃሚ ሆነዋል፡፡

   የጤና ጉዳዮችን በተመለከተ በየወሩ የግማሽ ቀን ውይይት በድርጅቱ የሰራተኛ ማህበር ክበብ የሻይ ቡና ፕሮግራም በማዘጋጀት ከተለያዩ የዲፓርትመንቶች ከተወጣጡ የድርጅት ሰራተኞች ጋር ጤናን በተመለከተ የውይይት ፕሮግራም የሚያካሂድ ሲሆን በነዚህ ውይይቶች ላይም መሰል የጤና እና የሙያ ደህንነት ጉዳዮች ተነስተው ሰራተኞች ውይይት እንደሚያደርጉ ገልፀዋል፡፡

       የዚህም ውይይት ዋነኛ አላማ የድርጅቱ ሰራተኞች ስለጤና ያላቸውን አመለካከት ለማጐልበት፣ ወቅታዊ የሆኑ የጤና ችግሮችን ለማየት እና የመከላከያ መንገዶችን ለማመልከት እንዲሁም እውቀት ለማስጨበጥ መሆኑን ተገልጿል፡፡

   ክፍሉ መሰል ውይይቶችን ከማድረግ ባሻገር ከሚመለከታቸው አካላት ጋር በመሆን የምልከታ ስራዎችን በየክፍሉ ዳሰሳ በማድረግ በተለይ ከእሣት እና ከደህንነት ጋር በተያያዘ ያሉ ክፍተቶችን በመለየት የማሟላት ስራዎችን እየሰራ ሲሆን ኤች.አይ.ቪ ኤድስን እንዲሁም የሴቶች ጥቃትን በተመለከተ በራሪ ወረቀቶችን በማዘጋጀት የሰራተኛው ግንዛቤ እንዲጨምር እየሰራ እንደሚገኝ ወ/ሮ የምስራች ገልፀዋል፡፡

የፖስታል ኦፕሬሽን ስልጠና ተሰጠ

     በኢትዮጵያ ፖስታ አገልግሎት ድርጅት የስልጠና ማዕከል ለኢ.ኤም.ኤስ ዲፓርትመንት ሰራተኞች የፖስታል ኦፕሬሽን /Postal Operation/ ስልጠና ተሰጠ፡፡

     ስልጠናውን በኢ.ኤም.ኤስ ዲፓርትመንት ስራ ላይ የተፈጠረን ክፍተት ለመቅረፍ በማሰብ 40 የኢ.ኤም.ኤስ ዲፓርትመንት ሰራተኞች ለአምስት ቀናት ተከታትለዋል፡፡

     በፖስት ፋይናንስ ዲፓርትመንት ውስጥ በጡረታ አበል ክፍያ እና ሰነድ አጣሪነት ሲሰሩ የነበሩ ሰራተኞች የኦፕሬሽን ስራው ዕውቀት እንዲኖራቸው ከዲፓርትመንቱ በቀረበው ጥያቄ መሰረት ስልጠናው መሰጠቱ ተገልጿል፡፡

   የፖስት ማስተር ክፍሎችን፣ የገቢ መልዕክት ዝርዘራ፣ የወጪ መልዕክት ዝርዘራ የገቢ መልዕክት ምዝገባ፣ የወጪ መልዕክት ምዝገባ፣ የቅበላ ምዝገባ፣ የእደላ ምዝገባ፣ የካውንተር ሰራተኛ ባህሪያት እንዲሁም የደንበኛ አያያዝን በተመለከተ በዝርዝር ትምህርት ተሰጥቷል፡፡

     ስልጠናውን ለሰራተኞች መስጠት ያስፈለገበት ዋነኛ ምክንያት የዲፖርትመንቱ ስራን ለማቀላጠፍ እና ጥራት ያለው አገልግሎት ለደንበኞች ለመስጠት፣ ደንበኞችን በአግባቡ ለማስተናገድ እንዲቻል እና የዲፓርትመንቱን ሰራተኞች እውቀት ለማጐልበት አስፈላጊ መሆኑ በመታመኑ እንደሆነ ተገልጿል፡፡

     የፖስታል ኦፕሬሽን ስልጠናው በዋናው ፖስታ ቤት ከታህሳስ 5 እስከ ታህሳስ 9 ቀን 2013 ዓ.ም በድርጅቱ ዋና መስሪያ ቤት ህንፃ በ3ኛ እና 4ኛ ፎቅ የስብሰባ አዳራሽ በሁለት ፈረቃ ተሰጥቷል፡፡

ለሰዓሊ ቦጋለ ቤተሰቦች የምስጋና ስጦታ ተበረከተ

የኢትዮጵያ ፖስታ አገልግሎት ድርጅት በድርጅቱ ከ30 ዓመታት በላይ በቴምብር ዲዛይን ስራ አገልግሎ ህይወቱ ላለፈው ለሰዓሊ ቦጋለ በላቸው ቤተሰቦች የምስጋና ስጦታ አበረከተ፡፡

   አቶ ቦጋለ በላቸው ለመጀመሪያ ጊዜ የቴምብር ዲዛይን የሰራው በ1965 ዓ.ም ሲሆን በህይወት ዘመኑ 131 ቴምብሮችን በሴት እንዲሁም 631 ቴምብሮች ዲዛይንን በነጠላ ሰርቷል፡፡

     ድርጅቱ ለአቶ ቦጋለ በላቸው ባለቤት ወ/ሮ ውቢት ዘውዴ የ100‚000.00 /አንድ መቶ ሺህ ብር/ እንዲሁም ከ30 ዓመታት በላይ በቴምብር ስራው ላይ እና ለኢትዮጵያ ፊላቴሊ እድገት ላበረከተው የላቀ አስተዋጽኦ የምስክር ወረቀት በድርጅቱ ዋና ስራ አስፈፃሚ ወ/ሮ ሀና አርአያ ሥላሴ በኩል አበርክቷል፡፡

   ወ/ሮ ሀና ሥጦታውን ካበረከቱ በኋላ ባስተላለፉት መልዕክት ሰዓሊ ቦጋለ በላቸው ለሀገራችን ፊላቴሊ እድገት እንዲሁም በተለያዩ መማሪያ መፃህፍት ላይ ባሰፈራቸው ስዕሎች የራሱን አሻራ ጥሎ ያለፈ መሆኑን አመልክተው ሁላችንም የእሱን ታታሪነት ልንከተል እንደሚገባ ገልፀው፤ ለሰዓሊ ቦጋለ ዛሬ የተደረገው ስጦታ ለቀሪውም ሰራተኛ ማበረታቻ እንደሚሆን ገልፀዋል፡፡

   በውጪ አገር የኢትዮጵያ ፊላቴሊ ማህበር ዳይሬክተር አቶ ወንድሙ ዓለማየሁ ዕውቅናው በተሰጠበት ወቅት እንደተናገሩት ሰዓሊ ቦጋለ በላቸው በርካታ ቴምብሮችን ዲዛይን እንዳደረገ፣ በአለም ላይ ወደ ጠፈር ለመጓዝ ከተመረጡ ሀገሮች አንዷ ኢትዮጵያ እንደነበረችና አቶ ቦጋለ ከነደፋቸው ቴምብሮችም ወደ ጨረቃ አንዱ ሄዶ መምጣቱን ተናግረዋል፤ አክለውም ሰዓሊ ቦጋለ የሰራቸው ቴምብሮችም ለፊላቴሊው እድገት ከፍተኛ አስተዋጽኦ ማበርከታቸውንም ገልፀዋል፡፡

     የኢትዮጵያ ሰዓሊያን እና ቀራፂያን ማህበር ፕሬዝዳንት አቶ አክሊሉ መንግስቴ በበኩላቸው ቦጋለ በባህሪው ጭምተኛ እና ጠንካራ ስብእና የነበረው፤ በስራው ፍፁም ጥራት ያለው ስራ የሚሰራ ሰዓሊ እንደነበር ገልፀው ድርጅቱ ላደረገው ስጦታው የተሰማቸውን ደስታ ገልፀዋል፡፡

   የኢትዮጵያ ብሔራዊ ፖስታ ሙዚየም ሀላፊ አቶ ሀይለየሱስ አራርሶ ስለ ሰዓሊ ቦጋለ በላቸው እና ሰፋ ያለ ማብራሪያ ስለ ስራዎቹ ያቀረቡ ሲሆን ስዕሎቹ ፍፁም ኢትዮጵያዊ የሆኑ እንደነበሩ፣ ሀገራችንን ለማስተዋወቅ በግንባር ቀደምትነት የአምባሣደር ሚናቸውን የተወጡ መሆናቸውን ገልፀዋል፡፡ አቶ ቦጋለ በላቸው በተለያዩ የተረት መጽሐፍት ላይ እና የትምህርት መፃህፍት ላይ ሥዕሎችን እንዲሁም የበርካታ ድርጅቶችን ሎጐ እንዲሁም ለኮምፒውተር ጽሁፍ የሚሆኑትን ፎንቶች ሰርቷል፡፡

የዓለም የፀረ-ሙስና ቀን ተከበረ

     “የትውልድን የሥነ ምግባር ግንባታን በጠንካራ ዲሲፒሊን በመምራት ሌብነትን እና ብልሹ አሰራርን በመታገል የብልጽግና ጉዟችንን እናፈጥናለን” በሚል መሪቃል የዓለም የፀረ-ሙስና ቀን በኢትዮጵያ ፖስታ አገልግሎት ድርጅት ተከብሯል፡፡ 

     በዓሉ በመላው ሀገራቱ በሚገኙ ሪጅን ፖስታ ቤቶች ህዳር 25 ቀን 2013 ዓ.ም የተከበረ ሲሆን በተለይ በዋናው ፖስታ ቤት በድርጅቱ የመሰብሰቢያ አዳራሽ ዕለቱን በማስመልከት የተዘጋጀውን ሰነድ በማቅረብ እና በድርጅቱ ውስጥ ከሙስና እና ከብልሹ አሰራሮች ጋር የተያያዙ ጉዳዮች ቀርበው ውይይት ተደርጐባቸዋል፡፡

   በዓሉ የሚከበርበት ዋና ምክንያት በየሀገሪቱ የሚገኙ ህዝቦች በሙስና ምንነትና በሚያስከትለው ጉዳት እና መፍትሄዎቹ ዙሪያ ያላቸውን ግንዛቤ ለማሣደግና መንግስታትም ሙስና በኢኮኖሚ ዕድገት፣ በሰላምና በመልካም አስተዳደር ላይ የሚያሣድረውን አሉታዊ ተጽእኖ እንዲከላከሉ ለማነሣሣት ነው፡፡

   የድርጅቱ የሀብት አስተዳደር ዘርፍ ም/ዋ/ሥራ አስፈፃሚ አቶ አስማረ ይገዙ ሰነዱን አቅርበዋል፡፡ በሰነዱም፡- መልካም የስነምግባር ግንባታ ምን መሆን እንዳለበት፣ ትውልድን በስነምግባር ለመገንባት ከተለያዩ አካላት ምን እንደሚጠበቅ፣ ሰፊ ማብራሪያ አቅርበዋል፡፡

     በድርጅቱ የሚታዩ ከሙስና እና ከብልሹ አሰራሮች ጋር የተያያዙ ጉዳዮችም አቅርበው ውይይት ተደርጓል፡፡ አቶ አስማረ እንዳሉትም በድርጅቱ የበዓሉ አዘጋጅ ኮሚቴዎች በተዘጋጀው ሰነድ፣ የገንዘብ ጉድለት መኖር፣ የወጪ ቁጥጥር ስርዓት የላላ መሆን፣ የኦዲት አሰራር ክፍተት መኖር፣ ከመልዕክቶች መጥፋት ጋር በተያያዘ ተጠያቂነት አለመኖር፣ የደንበኞች ቅሬታ መኖር፣ የተጠናከረ የደንበኞች አገልግሎት አለመኖር፣ ከመዋቅር ትግበራ ጋር በተያያዘ የሰራተኞች ቅሬታ መብዛት፣ ከንብረት አያያዝ ጋር በተያያዘ ክፍተት መኖር፣ ማኑዋሎች ወቅታዊ አለመሆናቸው፣ የስራ ሰዓት መግቢያና መውጫ ቁጥጥር አለመኖር፣ ከዕድገትና ዝውውር ጋር በተያያዘ እንዲሁም ዘመናዊ አሰራር አለመኖራቸው እና ከመሣሰሉት ጉዳዮች በተነሳ በድርጅቱ ለብልሹ አሰራር መንገድ የከፈቱ ጉዳዮች እንደሆኑ ተጠቅሷል፡፡

   በቀረበው መሰረትም ተሣታፊዎች ውይይት አድርገዋል፡፡ ከተነሱት ሀሣቦችም፤ ከግዢ ጋር በተያያዘ የሰነዶች ማጭበርበር መኖር፣ መልዕክቶችን ሆን ብሎ ወደተሣሣተ ተቀባይ ሀገር መላክ፣ የመልዕክት መጉደል፣ ሂሣብን በጊዜው ኦዲት አለማድረግ፣ ሰነዶችን ማጥፋት እና መደበቅ፣ ከግንባታ ጋር በተያያዘ ክፍተቶች መኖር፣ አስፈላጊውን መስፈርት የማያሟሉ ሰራተኞችን መመደብ፣ አለአግባብ ህገወጥ የሆነ ቅጥር ማካሄድ፣ እንዲሁም የተለያዩ ብልሹ አሰራሮች በድርጅት እንደሚታዩ ተሣታፊዎች አንስተዋል፡፡

   አቶ አስማረ ለተነሱት ሀሣቦች ማብራሪያ ሰጥተዋል፡፡

   ሙስና የሚጀምረው የስራ ሰዓትን ከመስረቅ፣ በስራ ሰዓት ተገቢውን ነገር ካለማከናወን እንደሆነ የገለፁት፤ ማንኛውም ሰራተኛ እረፍት በሚወጣበት ወቅት ሰውሀብት አስተዳደር ፈቃዱን ሣይሰጥ መውጣት እንደማይቻል በቀጣይም መመሪያ ተዘጋጅቶ ተግባራዊ እንደሚሆን ጠቁመዋል፡፡

   የስራ ሀላፊዎችም በተለይ ከስራ ሰዓት ማክበር ጋር በተያያዘ ከራሣቸው ጀምረው የባህሪ ለውጥ በማምጣት ቁጥጥር እና ክትትል ማድረግ እንደሚገባ ገልፀዋል፡፡

   በመጨረሻም የታዩ ችግሮችን እያዩ ዝም አለማለት፣ ለሚመለከተው አካል ጥቆማውን ማቅረብ ተገቢ እንደሆነ ገልፀዋል፡፡

በዓሉ በዓለም አቀፍ ደረጃ ለ17ኛ ጊዜ በሀገራችን ደግሞ ለ16ኛ ጊዜ የተከበረ መሆኑን ከተሰራጨው መረጃ መረዳት ተችሏል፡፡

የአለም አቀፍ የኤች አይቪ ኤድስ እና የፀረ ፆታ ጥቃት ቀን ተከበረ

           በኢትዮጵያ ፖስታ አገልግሎት ድርጅት አለም አቀፍ የኤድስ እና የፀረ ፆታ ጥቃት ቀን ህዳር 22/ቀን 2013 ዓ.ም በድርጅቱ ህንፃ 4ኛ ፎቅ መሰብሰቢያ አዳራሽ ተከብሯል፡፡

          በአለም አቀፍ ደረጃ ለ29ኛ ጊዜ በአገራችን ደግሞ ለ15ኛ ጊዜ የተከበረው የአለም አቀፍ የፀረ ፆታ ጥቃት ቀን “በሴቶች ላይ የሚፈፀም የሃይል ጥቃቶችን ያለመታገስ አቋም ቁርጠኛ በመሆን የብልጽግና ጉዞ እናረጋግጥ” በሚል መሪ ቃል ሲሆን በአለም አቀፍ ደረጃ ለ33ኛ ጊዜ የተከበረው የዓለም ኤች አይቪ ቀንም “ኤች አይቪን ለመግታት፣ ዓለም አቀፋዊ ትብብር፣ የጋራ ኃላፊነት” በሚል መሪ ቃል ተከብሮ ውሏል፡፡

             በዕለቱ ንግግር ያደረጉት የሴቶችና ወጣቶች ጉዳይ ዲፓርትመንት ቺፍ ኦፊሰር ወ/ሮ እታገኝ ተካልኝ እንደተናገሩት በተለይ ኮረና በዓለማችን ከተከሰተ በኋላ የፆታ ጥቃቱ   በከፍተኛ መጠን መጨመሩን እንዲሁም የኤች አይቪ ቫይረሱ በደማቸው ላለባቸውም አስቸጋሪ ጊዜ አንደሆነም ገልፀዋል፡፡ በመሆኑም ከኮረና ቫይረስ ጋር በተያያዘ ኤች.አይ.ቪ ኤድስን እና የፀረ ፆታ ጥቃትን አስመልክተው ከፍተኛ ትኩረት እንዲሰጠው እና ጥንቃቄውም ተጠናክሮ መቀጠል እንደሚገባው ተናግረዋል፡፡

              በበአሉ ላይ ፀረ ፆታ ጥቃትንና ኤች.አይ.ቪ እንዲሁም የኮረና ቫይረስ በአለማችን እና በሀገራችን በሚመለከት የተዘጋጁ ወቅታዊ ጽሁፎችን በሲ/ር ረሚላ አህመድ የሴቶች ጉዳይ ማኔጀር የቀረበ ሲሆን ይኸውም የኤች አይቪ ኤድስ መረጃ በአለማችን እና በአጉራችን ያለበትን ደረጃ፤ እንዲሁም በኮረና ቫይረስ ወረርሽኝ ዙሪያ ማብራሪያ ተሰጥቷል፡፡

            ከዚህ በተጨማሪ ጥቃት የሚፈፀምባቸው አካላት እነማን እንደሆኑ፤ ጥቃት የሚፈፀምባቸው ቦታዎችን እና የሚያስከትሉት ማህበራዊ እና ኢኮኖሚያዊ ቀውሶች በተመለከተ፤ ፆታን መሰረት ያደረጉ ጥቃቶች የሚያስከትሉት ግለሰባዊ፣ ማህበራዊ፣ አገራዊ ጉዳቶች ላይ ሰፊ ማብራሪያ ቀርቧል

         በአገራችን ከህዳር 15 እስከ ህዳር 30 ለተከታታይ 16 “ቀናት የፀረ ፆታ ጥቃትን ለመከላከልና አጋርነትን ለመግለጽ” በሚል መሪ ቃል የሚከበር ሲሆን በአሉ ከድርጅቱ ከተለያዩ የስራ ክፍሎች የተውጣጡ ሰራተኞች ተሣታፊ ሆነዋል፡፡

የኢ.ኤም.ኤስ ዲፓርትመንት የመልዕክት ማደያ ክፍል የቢሮ ለውጥ አደረገ

     ከጊዜ ወደ ጊዜ እየጨመረ የመጣውን የኢ.ኤም.ኤስ የደንበኞች ቁጥር አስመልክቶ አገልግሎቱን በተሻለ ሁኔታ ለመስጠት አዲስ የቢሮ አደረጃጀት ተግባራዊ ሆኗል፡፡

     የኢትዮጵያ ፖስታ አገልግሎት ድርጅት ደንበኛ ተኮር አገልግሎት ለመስጠት በማሰብ ቁጥሩ እየበዛ የመጣውን የኢ.ኤም.ኤስ ደንበኛ ጥራት ያለውና ቀልጣፋ አገልግሎት ለመስጠት በኢ.ኤም.ኤስ ዲፓርትመንት ስር የሚገኘውን የመጪ መልዕክት ማደያ ክፍል ወደዋናው ካውንተር ማዘዋወሩ ተገለፀ፡፡ ቀደም ሲል መልዕክት የሚታደለው በአንድ ካውንተር ብቻ የነበረ ሲሆን በቢሮው አደረጃጀቱ በተጨመሩ ካውንተሮች የመልዕክት መቀበልና የማደል ስራዎች በስፋት እንዲሰሩ ተመቻችቶ አስራ አንድ ካውንተሮች የመልዕክት ቅበላ እንዲሁም ሁለት ካውንተሮች የመልዕክት ዕደላ እያካሄዱ ይገኛሉ፡፡

 በመሆኑም በቦታው ሽግሽጉ በተገኘው ሰፊ ቦታም መልዕክቶችን በፊደል ተራ ቅደም ተከተል በማስቀመጥ፣ በፍጥነት የደንበኞችን መልዕክት መለየት አስችሏል፤ የእደላ ጊዜውን ማፍጠን ተችሏል፡፡ ከዚህም በተጨማሪ ሳይታደሉ የቆዩ መልዕክቶችን ምክንያታቸውን በመለየት ወደሚመለከተው ክፍል ለማስተላለፍ በዝግጅት ላይ መሆናቸውም ታውቋል፡፡

     የኢ.ኤም.ኤስ መልዕክቶች ከሀገር ውስጥም ሆነ ከውጪ ሀገር የሚላኩም እና የሚታደሉ የመልዕክቶች ዝግጅት የሚሰራው ከዋናው ካውንተር ጀርባ በመሆኑ ከዚህ በፊት የአንድ ዲፖርትመንት ስራ በተለያየ ቦታ መሆኑ የስራ መጓተትን፣ የመልዕክቶች ደህንነት እንዲሁም ሰራተኞች ላይ ከፍተኛ የስራ ጫና ያስከትል እንደነበረ ተገልጿል፡፡ በአሁኑ ጊዜ ከሂያጅ እና ከመጪ ክፍል ጋር የመልዕክት ቅብብሉን ምቹ እንዲሆን በመደረጉ ለዲፖርትመንቱ ሰራተኞች ምቹ የስራ ቦታን ከመፍጠሩ ጥሩ አገልግሎት ለደንበኞች መስጠት ማስቻሉ ተገልጿል፡፡

  

የሰራተኞች

ስብሰባ ተካሄደ

     አጠቃላይ የሰራተኞች ስብሰባ ተካሄደ፡፡ ውይይቱ በአዲስ አበባ ከተማ ከሚገኙ ሰራተኞች ጋር ጥቅምት 7 እና 8/2013 ዓ.ም በራስ ሆቴል ተካሂዷል፡፡

   ከኮቪድ 19 ጋር በተያያዘ መላውን የድርጅቱ ሰራተኛን መሰብሰብ ባለመቻሉ በከተማው ከሚገኙ ግማሽ ሰራተኞች ጋር በሁለት ምድብ በመክፈል ለግማሽ ቀን ውይይቱ ተደርጓል፡፡

     እንደውይይት መነሻም የድርጅቱ የ2013 በጀት ዓመት የመጀመሪያ ሶስት ወራት አፈፃፀም ሪፖርት በድርጅቱ የእቅድ እና የለውጥ ስራዎች ዲፖርትመንት ቺፍ ኦፊሰር ወ/ት ዘቢደር ታምሩ ቀርቧል፡፡

     ሰራተኞችም አጠቃላይ ጥያቄዎች ያቀረቡ ሲሆን፤ ካነሷቸው ጥያቄዎች ውስጥም አደረጃጀት እና ምደባን ጥቅማጥቅሞችን በድርጅቱ ስላሉ ብልሹ አሰራሮች እና ለውጦች፣ ስለአገልግሎት አሰጣጥ፣ ስለ አገልግሎት መስጪያ ጣቢያዎች ወዘተ የተመለከቱትን አንስተዋል፡፡ የድርጅቱ ዋና ስራ አስፈፃሚ ወ/ሮ ሀና አርአያ ስላሴ ከሰራተኛው ጋር እስካሁን ሰፋ ባለመድረክ ተገናኝቶ መወያየት ያልተቻለው በኮቪድ 19 ምክንያት መሆኑን ገልፀው በተነሱት ጥያቄዎች እና አስተያየት ላይ ምላሻቸውን ሰጥተዋል፡፡ ቀደም ሲል በርካታ ጥያቄዎች በአካል እና በደብዳቤም ከሰራተኛው እንደቀረበላቸው ገልፀው ያሉትን ብልሹ አሰራሮች ለማስተካከል እና ለመለወጥ ጥረት መደረጉን ገልፀዋል፡፡ ድርጅቱን ወደተሻለ ደረጃ መድረስ የአሰራር፣       የአደረጃጀት ስትራቴጂዎችን በመንደፍ እየሰራ መሆኑን ገልፀዋል፡፡

     በኦፕሬሽን ዘርፍ ለተነሱ ጥያቄዎች የድርጅቱ የኦፕሬሽን ዘርፍ ተጠባባቂ ም/ዋና ስራ አስፈፃሚ አቶ በዛብህ አስፋው ምላሽ የሰጡ ሲሆን በሀብት እና በሰው ሀይል ላይ ለተነሱ ጥያቄዎች ደግሞ የሀብት አስተዳደር ዘርፍ ም/ዋና ስራ አስፈፃሚው አቶ አስማረ ይገዙ ምላሽ ሰጥተዋል፡፡ ወ/ሮ ሀናም በማጠቃለያው ለድርጅቱ ጠንካራ አቅም ለመፍጠር በጋራ መስራት እንደሚገባ አስገንዝበዋል፡፡

                                       ከደንበኞች ጋር ውይይት ተካሄደ

     የኢትዮጵያ ፖስታ አገልግሎት ድርጅት በአዲስ አበባ ከተማ ከሚገኙ ደንበኞች ጋር ውይይት አካሄደ፡፡

ውይይቱ ላይም ጥቅምት 10 ቀን በዋሽንግተን ሆቴል የተካሄደ ሲሆን የኢ.ኤም.ኤስ፣ የጥቅል፣ የደብዳቤ፣ የቤት ለቤት፣ የፊላቴሊ፣ የፖስትፋይናንስ፣ የፖስት ባስ እና የፖስታ መደብር ደንበኞች ተገኝተዋል፡፡

በውይይቱ ወቅት በድርጅቱ የኮሙኒኬሽን እና ዓለም አቀፍ ግኝኙነት ቺፍ ኦፊሰር ወ/ሮ ዝይን ገድሉ አማካኝነት የድርጅቱ የ2013 በጀት ዓመት ዕቅድ ቀርቧል፡፡ ደንበኞቹም በእቅዱ እና በአገልግሎት አሰጣጡ ዙሪያ በርካታ ግብዓትን ሰጥተዋል፡፡

     ስለመልዕክቶች መዘግየት እና መጥፋት፣ ስለሰራተኞች ስነ ምግባር፣ ስለአገልግሎት መስጪያ ጣቢያዎች ሁኔታ፣ ስለአገልግሎት አሰጣጥ፣ ስለክፍያ አሰባሰብ ስለፊላቴሊ፣ ስለፖስት ባስ፣ ስለ ዳህንነት የመሳሰሉት ጥያቄዎች ተነስተዋል፡፡

     በውይይቱ ወቅትም የዋና ስራ አስፈፃሚ አቶ በዛብህ አስፋውና የዲፓርትመንት ሃላፊዎች ማብራሪያ የሰጡ ሲሆን ክትትል እና መሻሻል የሚገባቸው ጉዳዮችም በዝርዝር ለሚመለከታቸው ዲፓርትመንቶች ተቆጥረው እንደሚሰጡ እና አፈፃፀማቸውም ክትትል እንደሚደረግ ተነግረዋል፡፡

የደም ልገሣ ተካሄደ

   ኮቪድ 19 መከሰት ጋር በተያያዘ በሀገሪቱ ያጋጠመውን የደም እጥረት ለመቅረፍ በድርጅቱ የሴቶች እና ወጣቶች ዲፓርትመንት አስተባባሪነት የደም ልገሣ ተካሂዷል፡፡ የዲፓርትመንቱ ቺፍ ኦፊሰር ወ/ሮ እታገኝ ተካልኝ እንደገለፁት ኮቪድ 19 ከተከሰተ በኋላ ያጋጠመውን የደም እጥረት ለማገዝ የድርጅቱ ሰራተኞች የበኩላቸውን አስተዋጽኦ ማድረግ እንዲችሉ ለወገን ደራሽ ወገን በሚል መርሃ ግብር ሰራተኞችን በማስተባበር የደም ልገሣ እያደረገ መሆኑን ገልፀዋል፡፡

     በዚህም መሰረት በየሶስት ወሩ ፕሮግራም በመንደፍ የደም ልገሣ እየተደረገ ሲሆን ቫይረሱ በአገራችን ከተከሰተ በኋላ በድርጅቱ ቅጥር ግቢ ለሁለተኛ ጊዜ የደም ልገሣ ተካሂዷል፡፡

     በርካታ ሰራተኞችም የደም ልገሣውን የሰጡ ሲሆን ደም በመለገሣቸውም ደስተኛ መሆናቸውን፣ በዚህ መልኩም ሰብአዊ እርዳታ ማካሄድ መቻላቸውም ደስተኛ እንደሚያደርጋቸው ገልፀዋል፡፡

የፖስት ባስ የቢሮ ለውጥ አደረገ                           

ፖስት ባስ ከዚህ ቀደም በኪራይ አገልግሎት ከሚሰጥበት ቢሮ ወደ ዋናው መስሪያ ቤት ገባ፡፡ የአውቶብሶቹ መነሻና መድረሻ ከዚህ ቀደም ለገሀር የነበረ ሲሆን፤ ለዚህም በወር 80‚000.00 ብር (ሰማኒያ ሺ) እየተከፈለ አገልግሎቱን ሲሰጥ ቢቆይም፤ ቦታው ለልማት በመፍረሱ አጠናተራ ከሚገኘው ከሸበሌ ትራንሰፖርት ውስጥ በወር 90‚000.00 ብር (ዘጠና ሺ ብር) ኪራይ እየከፈለ እንዲሁም ለትኬት መቁረጫ ቢሮ 20‚000.00 (ሃያ ሺ) ብር በአጠቃላይ በወር 110‚000.00 (አንድመቶ አስር ሺ) ብር እየተከፈለ የትራንስፖርት አገልገግሎቱን ሲሰጥ እንደነበር ተገልጿል፡፡

አውቶብሶቹ ጥገና የሚደረግላቸው በዋናው ፖስታ ቤት በመሆኑ ቢሮዎቹም በተለያዩ ቦታዎች በመሆናቸው የስራ መጓተትን በመፍጠሩ፤ ሰራተኞችንም በቀላሉ ማግኘት እና ወጪን መቆጠብ አስፈላጊ በመሆኑ ምክንያት የቢሮ ለውጥ በማድረግ ወደ ዋናው ፖስታ ቤት መዛወሩን የዲፓርትመንቱ ተ/ሃላፊ አቶ እዝራ ሣህለድንግል ገልፀዋል፡፡

ይህም ዲፓርትመንቱ በወር ለኪራይ የሚከፈለውን ገንዘብ በማስቀረቱ እና ተጨማሪ የኮንትራት ስራዎችን ከተለያዩ ተቋማት ጋር በመስራቱ በአሁኑ ወቅት በአንድ ወር ከተያዘለት እቅድ ከ94 ፐርሰንት በላይ ማከናወን መቻሉም ተገልጿል፡፡ 

በርካታ ተወዳዳሪዎች በመኖራቸው እና በአለም ላይ በተከሰተው የኮቪድ 19 ቫይረስ ምክንያት እንደሌሎቹ ተወዳዳሪ ሆኖ ለመቅረብ አውቶብሶቹ መስታወታቸው የማይከፈት በመሆኑ እና ለማቀዝቀዣም ተጨማሪ ነዳጅ ወጪ የሚጠይቁ በመሆናቸው እንደልብ ገበያው ውስጥ ለመግባት እና ተመራጭ ለመሆን እንዳልተቻለ ተገልጿል፡፡

የፖስት ባስ የተቋቋመበት ዋና አላማ መልዕክቶችን በአግባቡ እና ደህንነታቸው ተጠብቆ ለማመላለስ ቢሆንም ከላይ መጫን ያለበት ኪሎ ውስን በመሆኑ ምክንያት እንደ አስፈላጊነቱ ተደራሽ መሆን አልቻለም፡፡ ይህን ችግር ለመቅረፍ ከሎጂስቲክ ዲፓርትመንት ጋር በመቀናጀት ስራዎችን በማቀላጠፍ እና መልእክቶች ደህንነታቸው ተጠብቆ ለማመላለስ ጥናት እየተደረገ መሆኑን አሳውቀዋል፡፡

ኮቪድ 19 በሀገራችን ከተከሰተ በኋላም የመጀመሪያውን ጉዞ በኮንትራት ስራ ወደ ክፍለሀገር በ25/02/2013 ጀምሯል፡፡ በኢትዮጵያ ፖስታ አገልግሎት ድርጅት ውስጥ የፖስት ባስ ዲፖርትመንት በ 2001 ዓ.ም የተቋቋመ ሲሆን በአሁኑ ወቅት ካሉት አውቶብሶች ውስጥ 12 አውቶቢሶች በስራ ላይ የሚገኙ መሆኑ ታውቃል፡፡  

                                 የአለም ፖስታ ቀን ተከበረ

የዓለም ፖስታ ህብረት የተመሰረተበት 146 ዓመት በመላው ዓለም በሚገኙ የፖስታ አስተዳደሮችMore than mail” ከደብዳቤ በላይ በሚል መሪ ቃል ተከብሮ ውሏል በተለይ በኢትዮትያ ፖስታ አገልግሎት ድርጅት ኮረናን በመከላከል የዘመናዊውን ፖስታ እድገት እናፋጥናለንበሚል መሪ ቃል ተከብሯል፡፡

     የዓለም ፖስታ ቀን በኢትዮጵያ ፖስታ አገልግሎት ድርጅት የተከበረው በአዲስ አበባ አሮጌው ፖስታ ቤት የቴምብር አውደ ርዕይ በማዘጋጀት ነው፡፡ አውደ ርዕዩ በኢትዮጵያዊያን ብቻ የተነደፉ ወጥ የእጅ ስራ የቴምብር ዲዛይኖች ለእይታ በቅተዋል፡፡   gm2

አውደ ርዕዩ ለተከታታይ 7 ቀናት ለፊላቴሊ አፍቃሪያን እና ለስዕል ጥበበብ አፍቃሪያን መጎብኘት እንዲችሉ ክፍት እንደሚሆን ተገልጿል፡፡

በዕለቱ የድርጅቱ ዋና ሥራ አስፈጻሚ / ሐና አርአያ ሥላሴ ባደረጉት ንግግር ድርጅቱ የደንበኞችን ፍላጎት ለማርካት ዘመናዊ የሆነ አሰራርን ለማሳደግ ፣ጥራት ያለው አገልግሎት ለመስጠት በተጠናከረ ሁኔታ ተግባር ላይ እንደሚገኝ ገልጸዋል፡፡ እንዲሁም አዳዲስ አገልግሎቶችን ወደ ድርጅቱ በማምጣት ደንበኞችን አርኪ የሆነ አገልግሎት ለመስጠት ጥረት እያደረገ እንደሚገኝ ጠቁመዋል፡፡ ጥራትና ደህንነቱ የተረጋገጠ ዘርፈ ብዙ አገልግሎቶች እስከ ገጠር ወረዳ በማድረስና ተደራሽነቱን በማረጋገጥ የተጠቃሚዎቹን እርካታ ለመጨመር ከቀድሞ በተሻለ በመሥራት ላይ ይገኛል፡፡

የአለም ፖስታ ህብረት ያስቀመጠውን የአገልግሎት ደረጃ ለማሟላት ሲስተሞችን የማስጀመር እና ለሰራተኞች ስልጠና የመስጠት ተግባራት ተከናውነዋል፡፡ አለም በስፋት እየተጠቀመበት ወዳለው የኢኮሜርስ ስራ ድርጅቱ ለመግባት በዝግጅት ላይ እንደሚገኝ ተናግረዋል፡፡

ተተኪው ትውልድ በፖስታ ቴምብር እና ከቴምብር ጋር ተያያዙ ስራዎች ላይ ግንዛቤ እንዲኖረው ታስቦ የአለም ፖስታ ቀንን በማስመልክት በሀገሪቷ ሰዓሊያን የተነደ የቴምብር ስራዎች ለእይታ እንደበቁም ገልዋል ፡፡

     የዓለም ፖስታ ህብረት ዋና ፀሐፊ ሚስተር ሁሴን ቢሻር በዓሉን አስመልክተው ባስተላለፉት መልዕክት የፖስታው ኢንዱስትሪ በመገናኛው ዘርፍ ፈር ቀዳጅነቱን በአሁኑ ዘመንም እያሳየ መሆኑን ገልጸው፣ በተለይ አለማችን በአሁን ሰዓትእያስተናገደችው የምትገኘው የኮቪድ 19 ወረሽኝ አሁንም ፖስታ መተኪያ የሌለው የመገናኛ ዘዴ መሆኑን ማሳየቱን ገልዋል፡፡ በተለያዩ አለማት የአየር መጓጓዣዎች ዝግ በሆነበት ወቅት የፖስታው ኢንዱስ ከመልዕክት ማመላለሱ በተጨማሪ የተለያዩ የትራስፖርት አማራጮችን በመጠቀም በጠንካራ ሰራተኞቹ ግንባር ቀደም ተሰላፊነት በመሆን በየቤቱ ተቀምጦ ለነበረው ዜጋው ቁሳቁሶ መድሀኒቶችን፣ የመከላከያ ቁሶችን፣ የምግብ ውጤቶችን እና መሰል ጉዳዮችን አድርሷል፡፡ በዚህም አሁንም ግንባር ተሳታፊነቱን በመቀጠል ላይ እንደሚገኝ ገልጸዋል፡፡ የፖስታው ዘርፍ ባለፈባቸው ዓመታት በርካታ ውጣ ውረዶችን በድል አድራጊነት በመወጣት አገልግሎቱን ማዘመን ችሏል፡፡ አሁንም በርካታ የፈጠራ ተግባራት በወረርሽኙ እንደታዩ እና ጠንካራ የፖስታ አስተዳደሮችም አጋጣሚውን በመጠቀም የበርካታ አገልግሎቶችና የፈጠራ ባለቤቶችም ሆነዋል፡፡

ከጥንት ጀምሮ ጦርነቶች፣ ወረርሽኞች፣ የተፈጥሮ አደጋዎች መሰናክል ቢሆኑብንም ምንጊዜም ከመልዕክት አድራሽነታችን የሚገታን የለም በማለት ጠቅሰዋል፡፡

   በዕለቱ ፊላቴሊስቶች፣ ሰዓሊያን፣ የኤስ ኦ ኤስ ህፃናት መንደር ልጆች እና የድርጅቱ ማኔጅመንት አባላት በፕሮግራሙ ላይ ተገኝተዋል፡፡

የፐርፎርማንስ እና ኦዲት ስልጠና ተሰጠ

     በኢትዮጵያ ፖስታ አገልግሎት ድርጅት ትምህርት ክፍል የፐርፎርማን እና ፋይናይሻል ኦዲት ስልጠና ከመስከረም 4 እስከ መስከረም 7 ቀን 2013 ዓ.ም ብዛታቸው አስር ለሆነ የድርጅቱ ሰራተኞች ተሰጥቷል፡፡

     ስልጠናው ሁለት ዘርፎችን ያካተተ ሲሆን አንደኛው ዘርፍ በፐርፎርማንስ ላይ ያተኮረ ነው፤ በውስጡም የፐርፎርማንስ ርዕሰ ጉዳዩን፣ አላማውን፣ አስፈላጊነቱን እና ቅደም ተከተሉን በዝርዝር ተካቷል፡፡

   ይህ ስልጠና የአንድን ድርጅት የእድገት ደረጃ ለማሳየት እና የድርጅቱ ስራ በሚከናወንበት ጊዜ ቅድመ ሁኔታውን እና አሁን የሚገኝበትን ደረጃ ለማነፃፀር ጠቀሜታ እንዳለው ተገልጿል፡፡

     በሁለተኛው ዘርፍ ስልጠናው ውስጥ የተካተተው የፋይናይሻል ኦዲት አስፈላጊነት፣ የኦዲት ዐይነቶችና የኦዲት መርሆዎች ሲሆን የዚህ ስልጠና ዓላማም በድርጅቱ የሚታዩ ክፍተቶችን ለመሙላት እንደሆነም ተገልጿል፡፡

የደንበኞች አገልግሎት ክፍል እየተደራጀ ነው

     አንድ አገልግሎት ሰጪ ተቋም የደንበኞቹን ፍላጐት ለማርካት ማከናወን ከሚገባቸው ቁልፍ ተግባራት ውስጥ የደንበኞች አገልግሎቱ የተጠናከረ እንዲሆን መስራት ነው፡፡ የኢትዮጵያ ፖስታ አገልግሎት ድርጅትም ከመልዕክት መላክ እና መቀበል ሂደት ጋር በተያያዘ ደንበኞች ለሚያቀርቡት ጥያቄ ፈጣን ምላሽ ለመስጠት እየሰራ ይገኛል፡፡

       በዚህም መሰረት የደንበኞች አገልግሎት የተጠናከረ እንዲሆን በርካታ ማሻሻያዎች ተግባር ላይ ውለዋል፡፡ በቢሮ አደረጃጀቱ ከዚህ ቀደም ተበታትነው የነበሩ የኢ.ኤም.ኤስ፣ የጥቅል እና የደብዳቤ መረጃ መስጪያ ቢሮዎች በአንድ አደረጃጀት ሥር እንዲሆኑ፣ እንዲሁም በአንድ ቢሮ ውስጥ አገልግሎት እንዲሰጡ ተደርጓል፡፡

       የሰው ሀይል አደረጃጀቱም እንዲሟላ የተደረገ ሲሆን ደንበኞችም ያለውጣ ውረድ ጥያቄዎቻቸውን በአንድ መስኮት የሚያቀርቡበትን አሰራር መፍጠር ተችሏል፡፡ ከቢሮ አቀማመጥ (ከቢሮ አደረጃጀት) ያደረገው ለውጥም ለደንበኞች እና ለሰራተኞች አመቺ ሁኔታን ፈጥሯል፡፡

     በስራም ላይ ከፍተኛ ለውጥ ማምጣት መቻሉ ተገልጿል፡፡ ተቋርጦ የነበረው የመረጃ አገልግሎት ዴስክም ስራ እንዲጀምር ተደርጓል፡፡ ሀገር ውስጥም ሆነ ወደውጪ የሚላኩ መልዕክቶች ላይ የተለያዩ ችግሮች በሚፈጠሩ ጊዜ የተፈጠረውን ችግር መፍታት እና ዳግመኛ እንዳይከሰት ለማድረግ ጥረት እየተደረገም ይገኛል፡፡

     በአለማችን ላይ የኮረና ቫይረስ በመከሰቱ ምክንያት የተወሰኑ ሀገራት ወደ ሀገራቸው መልዕክቶች እንዳይገቡ እገዳ በማድረጋቸው የተፈጠሩ ችግሮች ቢኖሩም በአሁኑ ወቅት እገዳውን በማንሳታቸው የመልዕክቶች መዘግየት መቀነሱ ተጠቅሷል፡፡  

     ከዚህም በተጨማሪ ከደንበኞች የሚቀርቡ ጥያቄዎችን ጥብቅ ክትትል በማድረግ መልስ እንዲያገኙ እየተሰራ መሆኑ ተገልጿል፡፡

Custom Declaration System (CDS)ስልጠና ተሰጠ

የዓለም ፖስታ ህብረት ከጉሙሩክ ሥራ ጋር በተያያዘ ስራውን የተቀላጠፈ ማድረግ ይቻል ዘንድ የተለያዩ ኤሌክትሮኒካል የአሰራር ዘዴዎችን ቀይሶ በመንቀሣቀስ ላይ ይገኛል፡፡ ፖስታ አስተዳደሮች ከጃኑዋሪ 1/2021 ጀምሮ መሰል ሥራዎችን ለመስራት የሚያስችለው ቅድሚያ የሚላከው የኤሌክትሮኒክስ መረጃ ግዴታ እንደሆነ እያሣወቁ ይገኛሉ፡፡ ኢትዮጵያም በቴክኖሎጂ የታገዘ አሰራር በመተግበር ደንበኞች የተቀላጠፈ አገልግሎት ማግኘት የሚችሉበትን አሰራር ለመከተል ስራዎች መሰራት ጀምረዋል፡፡

     በዚህም መሰረት በዓለም ፖስታ ህብረት አሰልጣኝነት Custom Declaration System ስልጠና በኦን ላይን ተሰጥቷል፡፡

     ከኢንፎርሜሽን ቴክኖሎጂ፣ ከኢ.ኤም.ኤስ፣ ከጥቅል እና ከደብዳቤ ዲፓርትመንት የተወጣጡ 20 የስራ ሃላፊዎች እና ማናጀሮች የአሰልጣኞች ስልጠናውን ተከታትለዋል፡፡

   ከዚህም በተጨማሪ ለስራው ቅርበት ያላቸው በካውንተር እና በመልዕክት ክፍል ውስጥ የሚገኙ 68 የድርጅቱ ሰራተኞች በ ኢንፎርሜሽን ቴክኖሎጂ ክፍል ስልጠናውን ተከታትለዋል፡፡

   የስልጠናው ዋና አላማ ከ2021 ጀምሮ Custom Declaration System በአለም አቀፍ ደረጃ መተግበር ግዴታ በመሆኑ ምክንያት ሰራተኞችን እውቀት ለማስጨበጥ መሆኑ ተገልጿል፡፡

   ሲስተሙም ፖስታ አስተዳደሮች ወደሀገራቸው የሚላኩ ጥቅል መልዕክቶች ቅድሚያ የጉሙሩክ ዴክሌራሲዮን እንዲደርሣቸው ስለሚያደርግ ወደ ተቀባይ ሀገር መግባት የተከላከሉ እና ለደህንነቱ አስጊ የሆኑ በቅድሚያ መለየት ሥለሚያስችል እንዲሁም መልዕክቱ ከመግባቱ በፊት ቅድሚያ ዴክላራሲዮን ተሰርቶ ስለሚጠብቅ ለደንበኞችን የተቀላጠፈ አገልግሎት ለመስጠት ያስችላል፡፡           

በተለያየ ምክንያት ጥፋት ያጠፉ ሰራተኞች አስተዳደራዊ እርምጃ ተወሰደባቸው

     የኢትዮጵያ ፖስታ አገልግሎት ድርጅት የተለያዩ ጥፋቶችን በፈጸሙ 22 ሰራተኞች ላይ አስተዳደራዊ እርምጃ ወሰደ፡፡

ከድርጅቱ ሀብት አስተዳደር ዘርፍ ምክትል ዋና ስራ አስፈጻሚ በተገኘው መረጃ መሰረት በድርጅቱ ህብረት ስምምነት ሰነድ እና በሀገሪቱ የአሰሪና ሰራተኛ አዋጅ መሰረት እርምጃ መወሰዱ ታውቋል፡፡

አዲስ የመጣው አመራር ባደረገው ዳሰሳ መሰረት በርካታ ሰራተኞች ጥፋት አጥፍተው በድርጅቱ መመሪያ መሰረት መሰናበት ቢገባቸውም ደመወዝ እየበሉ ይገኙ እንደነበር አቶ አስማረ ይገዙ ገልፀዋል፡፡

በዚህም መሰረት 22 ሰራተኞች ከድርጅቱ እንዲሰናበቱ የተደረገ ሲሆን ከዚህ ውስጥም ከፍተኛውን ቁጥር የያዙት ገንዘብ ያጎደሉ መሆናቸው ታውቋል፡፡

በድርጅቱ አሰሪና ሰራተኛ መተዳደሪያ ደንብ መሰረት አንድ ሰራተኛ ከ15,000 ብር በላይ ያጎደለ እንዲባረር የሚያዝ በመሆኑ የገንዘብ ጉድለት የተገኘባቸው ሰራተኞች እንዲሰናበቱ ተደርገዋል፡፡ እነዚህ ሰራተኞችም በአጠቃላይ ከ15.4 ሚሊዮን ብር በላይ አጉድለዋል፡፡

ከተሰናበቱት ሰራተኞች በሁለተኛ ደረጃ ላይ የሚገኙት ደግሞ በዲሲፕሊን ምክንያት የተሰናበቱት ሲሆን በራሳቸው ፈቃድ ከስራ በመቅረት፣ እረፍት ወጥተው በዚያው ሳይመለሱ በመቅረት የደንበኛ መስተንግዶ ላይ ችገር የፈጠሩ እና በተለያዩ ምክንያቶች የተሰናበቱ መሆናቸው የተገኘው መረጃ ያስረዳል፡፡

ከዚህ በተጨማሪ ሁለት የስራ መሪዎች ድርጅቱ እና መንግስት የጣለባቸውን ሀላፊነት ወደጎን በመተው እና ሀላፊነታቸውን በአግባቡ ባለመወጣት ምክንያት ሙስና ሰርተው በመገኘታቸው የሥራ ውላቸው እንዲቋረጥ ተደርጓል፡፡

በገንዘብ ጉድለት እና በሙስና ከስራቸው የተሰናበቱ ሰራተኞች በህግ ጉዳያቸው የተያዘ መሆኑ ተገልጿል፡፡

አቶ አስማረ እንደገለጹት ከዚህ ቀደም መሰናበት የነበረባቸው እና እስካሁን ሳይሰናበቱ የቀሩ ነገር ግን ጉዳያቸው በይርጋ የሚታገድ ሰራተኞችም በጊዜው አስተዳደራዊ እርምጃ መውሰድ ባለመቻሉ ወደ ሥራ ገበታቸው እንዲመለሱ መደረጉን ጠቅሰዋል፡፡

አዲሱ አመራር ወደ ስራ ሲመጣ በርካታ የተንጠለጠሉ የዲሲፕሊን ጉዳዮች እንደነበሩ የጠቀሱት ኃላፊው መሰል አስተዳደራዊ እርምጃዎች መወሰዳቸው ለቀሪው ሰራተኛ እና ለተሰናባቹም ለቀጣይ ህይወቱ ሊሆን እንደሚችል እምነታቸውን ገልጸዋል፡፡

           የሥራ ሰዓት ቁጥጥሩ ተጠናክሮ ይቀጥላል

ድርጅቱ እያከናወነ ያለው የስራ ሰዓት ቁጥጥር ውጤታማ እንደሆነ ተገለጸ፤ቁጥጥሩም ተጠናክሮ ይቀጥላል ፡፡

ድርጅቱ እያሰበ ላለው ስኬት በዋነኛነት የድርጅቱ ሰራተኞች በስራ ገበታቸው መገኘት እንደሆነ ይታወቃል፡፡

አዲሱ የስራ አመራር በተለያዩ ዲፓርትመንቶች እየተዟዟረ ባደረገው ምልከታ በርካታ ሰራተኞች እንዲሁም የስራ ሃላፊዎች በስራ ገበታቸው ባለመገኘታቸው ምክንያት ስራዎች በአግባቡ እየተሰሩ አለመሆኑን ተገንዝቧል፡፡ በዚህም የስራ ሰዓት ቁጥጥር ማድረጉ አስፈላጊ መሆኑ ስለታመነበት የሰዓት ፊርማ ቁጥጥሩ እንዲጀመር ተደርጓል፡፡

አንድ ሰራተኛ በቀን 8፡00 ሰዓት በመስራት ክፍያ ሊከፈለው የሚገባ መሆኑን የድርጅቱ አሰሪና ሰራተኛ መተዳደሪያ ደንብ እንዲሁም የአሰሪና ሰራተኛ አዋጁ ያስቀመጠ ቢሆንም እያንዳንዱ ሰራተኛ ስራውን አክብሮ በተቀመጠለት የስራ ሰዓት በአግባቡ እየሰራ አለመሆኑ በመታወቁ ምክንያት የስራ ሰዓት ቁጥጥሩ ተጀምሯል፡፡

ቁጥጥሩ ከተጀመረ በኋላ ሰራተኞች በጠዋት በስራ ቦታቸው ላይ እንዲሁም የመውጫ ሰዓት ጠብቀው ሲወጡ ታይተዋል፡፡ የድርጅቱ የመጀመሪያ ዋና አላማ ሰራኞች በስራ ገበታቸው ላይ እንዲገኙ ማድረግ ሲሆን በዚህም ከ85 እስከ 90 ፐርሰንት ውጤት ተገኝቷል፡፡

በስራ ሰዓት በስራ ቦታ መገኘት ድርጅቱ አዲስ ሊፈጥራቸው ካሰባቸው የድርጅቱ ባህሎች ውስጥ አንዱ መሆኑም ተጠቅሷል፡፡

የስራ ሰዓቱ ቁጥጥር ለጊዜው በዚሁ እንደሚቀጥል የተገለጸ ሲሆን፤ ወደፊት ኢአርፒ ሶፍት ዌር ተግባራዊ ሲሆን ዘመናዊ በሆነ መልኩ በአሻራ የስራ ሰዓት ቁጥጥሩ እንደሚቀጥል ተነግሯል፡፡

በተያያዘ ዜናም ከሰኞ እስከ አርብ ከስራ ሰዓት ውጪ እና ከሚመለከታቸው በስተቀር ቅዳሜና እሁድ በስራ ቦታ መገኘትንም በተመለከተ የቅርብ አለቃን አሳውቆ ለሚመለከታቸው አካላት የፈቃድ ፎርም በመላክ ወደስራ ገበታ መግባት የሚቻል ሲሆን ከዚያ ውጪ ግን ማንኛውም ሰራተኛ ከስራ ሰዓት ውጪ በቢሮ ውስጥ መገኘት እንደሌለበት መመሪያ ወጥቷል፡፡

ውሳኔው የተላለፈው የድርጀቱን ንብረት ለመጠበቅ ታስቦ ከደህንነት አንፃር የተላለፈ ሲሆን አደጋ ቢደርስ፣ ንብረት ቢጠፋ በእለቱ በስራ ገበታ ላይ የተገኘው ሰራተኛ ሀላፊነት መውሰድ እንዲችል እንዲሁም የድርጅቱ ንብረት እና ገንዘብ እንዳይባክን ለመቆጣጠር ታስቦ ተግባር ላይ የዋለ መመሪያ መሆኑ ተገልጿል፡፡

       ድርጅቱ ኮቪድ 19 ለመከላከል የሚያደርገው ጥረት ቀጥሏል

የአለም ፖስታ ህብረት በእርዳታ የላከው ማስክ ድርጅቱ ተረክቧል፡፡ የዓለም ፖስታ ህብርት በህብረቱ የልማት ትብብር ፕሮጀከት አማካኝነት ለ37 በማደግ ላይ ለሚገኙ ሀገራት እርዳታውን ለግሷል፡፡

በቀጣይም ወረርሽኙን ለመከላከል የሚረዱ ቁሶችን አስመልክቶ ከየሀገራቱ ፖስታ አስተዳደሮች መረጃ ከወሰደ በኋላ ማስክ፣ ሳኒታይዘር፣ እና ጓንት ለመላክ ቃል ገብቷል፡፡

ህብረቱ ለመለገስ ቃል ከተገባው 135,000 የፊት መሸፈኛ ማስክ ውስጥ በመጀመሪያው ዙር 32,000 ማስክ ተረክቧል፡፡

የዓለም ፖስታ ህብረት ዋና ዳይሬክተር እንዳሉት የፖስታው ሰራተኞች በኮቪድ 19 ወረርሸኝ ወቅት ከፊት መስመር ሆነው ህብረተሰቡን እያገለገሉ እንደሚገኙና ቅድሚያ ተጋላጭ ከሚሆኑት ውስጥ በቀዳሚነት ከሚጠቀሱት ውስጥ እንደሚሆኑ ገልጸዋል፡፡

ከአንድ ሚሊዮን በላይ ማስክ በመጀመሪያው ዙር ለ37 ሀገራት የተሰራጨ ሲሆን፤ ወጪ የተደረገው ከህብረቱ የልማት ትብብር በጀት እንዲሁም ከቻይና፣ ከፈረንሳይ፣ከጃፓን እና ከሲውዘርላንድ ሀገራት በተገኘ ድጋፍ ነው፡፡ የተባበሩት መንግስታት የፕሮጀክት ቢሮም ግዢውን እና የሎጂስቲኩን ስራ አከናውኗል፡፡

ከዓለም ፖስታ ህብረት የተገኘውም ማስክ በመላው ኢትዮጵያ ለሚገኙ የድርጅቱ ሰራተኞች ተሰራጭቷል፡፡

   የኢትዮጵያ ፖስታ አገልግሎት ድርጅት ከኮቪድ 19 ወረርሽን ጋር በተያያዘ ሰራተኞች ለቫይረሱ ያላቸውን ተጋላጭነት ለመቀነስ የተለያዩ ትምህርታዊ መረጃዎችን ሰራተኛው እንዲያውቀው ፣ የንጽህና መጠበቂያ ሳሙናዎችን፣ሳኒታይዘር እንዲሁም አልኮል እና የእጅ መታጠቢያዎች በየአገልግሎት መስጪያ ጣቢያዎች በማዘጋጀት የቫይረሱን ስርጭት ለመቀነስ እየሰራ ይገኛል፡፡

ይህንንም በተጠናከረ መልኩ እና በዘላቂነት ለመስራት ኮሚቴ ተዋቅሮ እየተንቀሳቀሰ ይገኛል፡፡

የንብረት ማስወገድ ስራ ተከናወነ

   በየኢትዮጵያ ፖስታ አገልግሎት ድርጅት በዋናው መስሪያ ቤት አገልግሎታቸው የተጠናቀቁ ቁሣቁሶች እንዲወገድ ተደረገ፡፡ በልየታውም ተበታትነው የነበሩ ንብረቶች፣ የተቆራረጡ ብረቶች ፣የመኪና ጐማዎች እና እንጨቶች ተገኝተዋል፡፡

     በግቢው ውስጥ የንብረት ማስወገዱ ስራ ድርጅቱን ከማስዋብ ስራ ጋር የተገናኘ ነው፡፡

     የድርጅቱን የማያስፈልጉ ንብረቶች ለይቶ እና በመልክ በመልክ በማስቀመጥ መወገድ ያለባቸው እንዲወገዱ፣ በጨረታ መልክ ለሽያጭ የሚቀርቡም እንዲሁ ዝግጅት እንዲደረግባቸው ተደርጓል፡፡

   በንብረት አስተዳደር ሰብሳቢነት በአምስት ኮሚቴዎች በማዋቀር ስራው ተከናውኗል፡፡ አላስፈላጊ ንብረቶችን በማስወገድ የግቢውን ውበት ቅርጽ እንዲይዝ አድርጐታል፡፡ ከዚህም በተጨማሪ በተለያዩ ምክንያቶች ሳይላኩ የቀሩ መልዕክቶች ኮሚቴው ባለበት ተወግዷል፡፡

የኢትዮጵያ ፖስታ አገልግሎት ድርጅት የማዕድ ማጋራት እያከናወነ ነው

maed የኢትዮጵያ ፖስታ አገልግሎት ድርጅት በኮቪድ 19 ኮረና ቫይረስ ምክንያት ለችግር ለተጋለጡ ዜጐች የማዕድ ማጋራት እያከናወነ ነው፡፡

     ድርጅቱ በሚገኝበት ክፍለ ከተማ ሥር ለሚገኙ ሀምሣ ዜጐች ለአንድ ወር የሚቆይ የማዕድ ማጋራት በፊንፊኔ አዳራሽ እያከናወነ ይገኛል፡፡

ፕሮግራሙ ከሐምሌ 14 ቀን 2012 ዓ.ም ጀምሮ ለአንድ ወር ይቆያል፡፡

     ፕሮግራሙን ያስጀመሩት የድርጅቱ ዋና ሥራ አስፈፃሚ ወ/ሮ ሀና አርአያሥላሴ እንዳሉት ድርጅቱ በ126 ዓመታት ጉዞው ህብረተሰቡን በተለያየ መልኩ ሲያገለግል የቆየ ሲሆን ማህበራዊ ሀላፊነቱንም ለመወጣት የተለያዩ ግለሰቦችን እና ተቋማትን በችግሮቻቸው ወቅት ከጐናቸው በመቆም ሲደግፍ ቆይቷል፡፡

     ለአንድ ወር የሚቆየው የማዕድ ማጋራት ሥራም የዚሁ አካል መሆኑን ጠቁመው ወደፊት በዚህ የማዕድ ማጋራት ላይ ተሣታፊ የሆኑትን እና ሌሎችን በመጨመር ቋሚ በሆነ መንገድ መርዳት የሚቻልበትን መንገድ ከሌሎች አካላት ጋር በመመካከር ላይ እንደሚገኙ ተናግረዋል፡፡

     ከማዕድ ማጋራቱ ባሻገር ለቤታቸው የሚያስፈልጋቸውን ግብዓቶች ለማሟላትም እየተሰራ እንደሚገኝ ጠቅሰዋል፡፡

ድርጅቱ መሠል ተግባራት እያከናወነ የወገን አለኝታነቱን በማሣየት እንደሚቀጥል ጠቁመዋል፡፡

የኢትዮጵያ ፖስታ አገልግሎት ድርጅት ማኔጅመንት እና ሠራተኞች ችግኝ ተከሉ

/ ሃና አርሃያ ስላሴ የኢትዮጵያ ፖስታ አገልግሎት ድርጅት ዋና ስራ አስፈፃሚ ከድርጅቱ ማኔጅመንት እና ሠራተኞች ጋር በመሆን ችግኝ ተከሉ፡፡

የችግኝ ተከላ መርሃ ግብሩ ሰኔ 18 ቀን 2012 በጉለሌ ክፍለ ከተማ ሚካኤል ቤተ ክርስቲያን ቅፅር ግቢ አካባቢ የተከናወነ ሲሆን በመላ ሃገሪቱ ተግባራዊ እየሆነ ያለው የአምስት ቢልዮን ችግኝ የመትከል አረንጓዴ አሻራ መርሃ ግብር አካል ነው፡፡

treplanting

የፖስታ ስራው መነቃቃት እያሳየ ነው

     ኮቪድ 19 (ኮሮና ቫይረስ) ባስከተለው ቀውስ ምክንያት ቀንሶ የነበረው የመልዕክት ትራፊክ በተለይ በኢ.ኤም.ኤስ በኩል ማንሰራራት እየታየበት ይገኛል፡፡

     በመጋቢት እና ሚያዚያ ወር ተቀዛቅዞ የነበረው የኢ.ኤም.ኤስ የመልዕክት ትራፊክ አማራጭ የማመላለሻ መንገዶችን በመፈለግ ስራው በድጋሚ እንዲያሰራራ ተደርጓል፡፡

     ድርጅቱ የራሱን የትራንስፖርት አማራጭ በመጠቀም መልዕክቶችን የማመላለስ ስራ እየሰራ ሲሆን፤ በተለይ ከሃገር ውጪ ለሚሄዱ መልዕክቶች አማራጭ አመላላሽ ድርጅቶችን በመፈለግ ተግባሩን እየተወጣ ይገኛል፡፡

   በተለይ የኢ.ኤም.ኤስ አፈፃፀም በመጋቢት ወር 27%፣ በሚያዚያ ወር 6% ብቻ የነበረ ሲሆን በግንቦት ወር ግን ከፍተኛ መነቃቃት ማሣየቱ ከዲፓርትመንቱ የተገኘው መረጃ ያሣያል፡፡

   ድርጅቱ በፖስታ ባስ በኩልም ወደ ክፍለ ሀገር የሚደረጉ ጉዞዎች በመረጣቸው ምክንያት፤ በአዲስ አበባ ከተማ ውስጥ ከተቋማት ጋር ኮንትራት በመግባት የሰርቪስ አገልግሎት በመስጠት ስራ እየሰራ ይገኛል፡፡

   ከዚህ በተጨማሪ በኢኮሜርሱ ዘርፍ አሁን ያለው ሁኔታ መልካም አጋጣሚዎችን እየፈጠረ በመሆኑ የተለያዩ የኤሌክትሮኒክ ግብይት አገልግሎት የሚሰጡ ድርጅቶች የአብረን እንስራ ጥያቄ ለድርጅቱ እያቀረቡ መሆኑ ከማርኬቲንግ ዲፖርትመንት የተገኘው መረጃ ያሳያል፡፡

በኢትዮጵያ ፖስታ አገልግሎት ድርጅት አዲስ ዋና ስራ አስፈፃሚ ተመደበ

የኢትዮጵያ ፖስታ አገልግሎት ድርጅት አዲስ ዋና ስራ አስፈፃሚ በጠቅላይ ሚኒስትር አብይ አህመድ ምደባ ተካሂዷል፡፡ ዋና ስራ አስፈጻሚዋ ወ/ሮ ሀና አርአያ ስላሴ ይባላሉ፡፡ በህግ የመጀመሪያ ዲግሪያቸውን ከአዲስ አበባ ዩኒቨርስቲ እንዲሁም ሁለተኛ ዲግሪያቸውን በህግ ከኒው ዮርክ የህግ ዩኒቨርስቲ አግኝተዋል፡፡ ወ/ሮ ሀና ፖስታ አገልግሎት ድርጀት ከመቀላቀላቸው በፊት በኢትዮጵያ ኢንቨስትመንት ኮሚሽን በምክትል ኮሚሽነርነት፣ በጠቅላይ ሚኒስቴር ጽህፈት ቤት በከፍተኛ ፖሊሲ ጥናት አጥኚነት እንዲሁም በአዲስ አበባ ዩኒቨርስቲ በህግ ፋኩልቲ በህግ መምህርነት አገልግለዋል፡፡ አዲሷ ዋና ስራ አስፈጻሚ በዋናው መስሪያ ቤት የሚገኙ የስራ ክፍሎችን በመጎብኘት ከሰራተኞች ጋር ትውውቅ አድርገዋል፡፡ የዲፓርትመንት ሀላፊዎችንም በተናጠል በመጥራት ስለሚመሩት ዲፓርትመንት ገለጻ ተደርጎላቸዋል፡፡ ለዋና ስራ አስፈጻሚዋ የተለያዩ አለም አቀፍ ድርጅቶች የእንኳን ደስ አልዎት መልዕክተ ያስተላለፉ ሲሆን በኢትዮጵያ ያለውን የፖስታ ስራ ለማሳደግ አብረው እንደሚሰሩ ገልጸዋል፡፡

        የአለም ፖስታ ህብረት በካርጎ መልዕክቶችን ለማደል እየሰራ ነው

የዓለም ፖስታ ህብረት በኮቪድ 19 ኮረና ቫይረስ ምክንያት የመንገደኞች በረራ በተለያዩ ሀገራት በመታገዱ ምክንያት በአለም አቀፍ የአየር ትራንስፖርት ማህበር የካርጎ ስራ ተጠናክሮ እንዲቀጥል በተጀመረው ዘመቻ መሳተፉን አስታውቋል፡፡ በአለም አቀፍ የአየር ትራንስፖርት ማህበር መሰረት ከቫይረሱ ጋር በተያያዘ እስካሁን ባለው መረጃ ከ50 በላ የሚሆኑ የአየር መንገዶች በረራቸውነ አቋርጠዋል፡፡ በዚህም ከ160 በላይ አገራት በዚህ ምከንያት ጫና እየደረሰባቸው ሲሆን ከአንድ ሚሊዮን በላይ የመንገደኞች በረራዎችም እስከ ጁን 30/2020 ተሰርዘዋል፡፡ በፖስታው ኢንዱስትሪ ዘርፍ የተሰማሩ የፖስታ አስተዳደሮች አብዛኛዎቹ የህብረቱ አባል ሀገሮች መልዕክታቸውን የሚያመላልሱት በህዝብ ማመላለሻ አውሮፕላኖች በመሆኑ በረራዎቹ በመታገዳቸው በፖስታው ዘርፍ ከፍተኛ የመልዕክት ትራፊክ መቀነሱ ተገልጿል፡፡ ከአለም ፖስታ ህብረት የወጣው መረጃ እንደሚያሳየው የፖስታ አስተዳደሮች የካርጎ ሰርቪስን እንዲጠቀሙ እና ኮቪድ 19 ኮረና ቫይረስን በተያያዘ የሚያስፈልጉ እቃዎችን በማጓጓዝ የመልዕክት ልውውጡን አጠናክረው መቀጠል እንደሚገባ ተጠቁሟል፡፡ የአለም ፖስታ ህብረት በአለም አቀፍ የአየር ትራንስፖርት የተጀመረውን ዘመቻ እንደሚደግፍና ሀገራትም ቢሮክራሲያቸውን በመቀነስ የካርጎ ትራንስፖርት ሰጪዎች በዘርፉ እንዲሰማሩ ጥረቱን እንደሚቀጥል ተገልጿል፡፡ የካርጎ ስራ ኮቪድ 19ኮረና ቫይረስ ለመዋጋት ለሚደረገው ጥረት ዋነኛ መሆኑ የተገለጸ ሲሆን ለአብነትም ሀይወት አዳኝ የሆኑ መድሀኒቶችን የጫኑ የካርጎ አውሮፕላኖች በሀገራት እልህ አስጨራሽ የሆኑ የቢሮክራሲ ገደቦች ችግር እየገጠማቸው እንደሆነ የማህበሩ ስራ አስፈጻሚ ተናግረዋል፡፡ እቃ የጫኑ አይሮፕላኖች በፍጥነት ገብተው ማራገፍ የሚችሉበትን አሰራር አገሮች እንዲቀይሱ፣ የሰዓት እላፊዎች እንዲነሱላቸው፣ የአየር ክልል በረራ ክፍያ እና የማቆሚያ ክፍያ እንዲነሳ፣ እንዲሁም የአቅርቦት ሰንሰለቱ ተጠናክሮ እንዲቀጥል የፖስታ አስተዳደሮች ያለገደብ ጭነት የሚጭኑበት ጊዜያዊ መብት ሊሰጧቸው እንደሚገባ ማህበሩ አሳስቧል፡፡

     የጡረታ ክፍያ ሰፋ ባለ ማዕከል ለመክፈል ጥረት እየተደረገ ነው

የኢትዮጵያ ፖስታ አገልግሎት ድርጅት ከኮቪድ 19 ኮረና ቫይረስ ጋር በተያያዘ ከዚህ ቀደም የጡረታ ክፍያ ይከናወንባቸው  የነበሩ ጣቢያዎችሰፋ ወዳለ ቦታ አየቀየረ መሆኑ ተገልጿል፡፡

ከማህበራዊ ዋስትና ባለስልጣን ጋር በመተባበር በየክፍያ ጣቢያዎቹ በመሄድ ቦታዎችን የማመቻቸት፣ የመክፈያ እና የወረፋ መጠበቂያ ወንበሮችን የማዘጋጀት ስራ ተሰርቷል፡፡ በክፍያው ላይ ለሚሳተፉ ሰራተኞችም አስፈላጊው የቅድመ ጥንቃቄ ግንዛቤ ማስጨበጫ እና ትምህርት የመስጠት ስራ ተሰጭቷል፡፡

ከዚህ በተጨማሪ ከኢትየጵያ ቀይ መስቀል ማህበር የተወከሉ በጎ ፈቃደኞች  በየክፍያ ጣቢያዎቹ በመገኘት ለአበል ተቀባዮች ትምህርት የመስጠት ስራ፣ በአልኮል እጅ የማጽዳት፣ ርቀታቸውን ጠብቀው እንዲስተናገዱ የማገዝ እና  ወረፋ የማስያዝ ስራ እያከናወኑ ይገኛሉ፡፡

ከፖስት ፋይናንስ ዲፓርትመንት በተገኘው መረጃ መሰረት  በተለይ በአዲስ አበባ ውስጥ የሚገኙ የክፍያ ጣቢያዎች በተፈለገው መልኩ አገልግሎት እየሰጡ መሆኑን ጠቁመዋል፡፡

በተያያዘ ዜና ድርጅቱ ኮቪድ 19 ስርጭትን ለመከላከል መንግስት ባወጣው መመሪያ መሰረት ሰራተኞች ፕሮግራም በማውጣት በፈረቃ እንዲሰሩ አስፈላጊ የሆኑ የመከላከያ እርምጃዎች በመውሰድ ደንበኞችን እንዲያገለግሉ፣የመገልገያ ቁሳቁሶችን በተገቢው መንገድ እንዲያጸዱ፣  ርቀታቸውን ጠብቀው እንዲሰሩ፣ እጅን በየጊዜው በመታጠብ የቫይረሱን ስርጭት እንዲገቱ እየተደረገ ይገኛል፡፡   

2011. Custom text here
Joomla 1.7 templates free by Joomla Template Maker and Free Joomla Templates