Home

Advertisement

we deliver small

ፖስታ ዜናዎች

                    ለግንባር ቀደም ሰራተኞች እውቅና ተሰጠ

  የኢትዮጵያ ፖስታ አገልግሎት ድርጅት በ2008 በጀት ዓመት አፈፃፀማቸው የላቀ ውጤት ላስመዘገቡ 364 የግንባር ቀደም ሰራተኞች የድርጅቱ የሥራ አመራር ቦርድ ሰብሳቢ፣ የድርጅቱ የሥራ መሪዎች፣ የመሰረታዊ ሰራተኛ ማህበር አመራሮችና መላው ሰራተኞች በተገኙበት እሁድ ግንቦት 27 ቀን 2009 ዓ.ም. የዕውቅና መስጠት ፕሮግራም አከናወነ፡፡

   የዕውቅና መስጠት ፕሮግራሙ የተከናወነው በአራዳ እና አዲስ አበባ ዞኖች ያሉ ሰራተኞች በአዲስ አበባ ከተማ ቦሌ ክፍለ ከተማ ወረዳ 03 ዞን 19 የህብረተሰብ ልማት ማዕከል ሲሆን ቀሪዎቹ 17 ዞኖች በየዞን ከተሞች መላው ሰራተኞች በተገኙበት ተከናውኗል፡፡

  የድርጅቱ ዋና ስራ አስኪያጅ አቶ ግደይ ገ/ዮሐንስ እንደተናገሩት ግንባር ቀደሞች በአመለካከታቸው፣ በፀረ ኪራይ ሰብሳቢነት ትግሉ በቀጥታም ሆነ በተዘዋዋሪ ባበረከቱት ንቁ ተሣትፎ፣ በስነ-ምግባራቸው፣ በተባባሪነታቸው፣ በክህሎት እና በተነሳሽነታቸው፣ እንዲሁም ያላቸውን ልምድና ተሞክሮ በማካፈልም ከሌሎች ሰራተኞች ጎልተው የሚታዩ የስራ ሃላፊዎች፣ የዞን ሃላፊዎች፣ የቡድን መሪዎች ወይም ሰራተኞች ናቸው ብለዋል፡፡

    በተጨማሪም የዚህ የጋራ ጥረታችን ፍሬ ከሆኑት አንዱ በዓለም ዓቀፍ የፖስታው መድረክ የ2016 የጥራት ሥራ አመራር የ“ቢ” ደረጃ ተሸላሚ በመሆን ዕውቅና የማግኘታችን፣ የህብረቱ የአስተዳደር ምክር ቤት አባል በመሆን መመረጥና የህብረቱ ልዩ ጉባዔ ለመጀመሪያ ጊዜ እ.ኤ.አ. በ2018 በሀገራችን እንዲካሄድ በሙሉ ድምጽ ተቀባይነት ማግኘት የሚጠቀሱ ሲሆን ውጤቱ የጋራ መሆኑንም በማሳሰብ ለሁሉም ምስጋናቸውን አቅርበዋል፡፡

    በመቀጠልም የድርጅቱ የስራ አመራር ቦርድ ሰብሳቢ ክቡር ዶ/ር ሥንታየሁ ወ/ሚካኤል ድርጅቱ የለውጥ ሰራዊት አደረጃጀትን ተግባራዊ ማድረግ ከጀመረ ወዲህ መታየት የጀመሩ ውጤቶች የሚያስመሰግኑ በመሆናቸው ዕውቅና አሰጣጡ አግባብነት ያለው መሆኑን ጠቁመዋል፡፡ ወደፊትም ቀጣይነት የሚኖረውና ዕውቅናው በተሻለ ተነሳሳሽነት ከዚህ የተሻለ ውጤት ለማስመዝገብ ስንቅ ሊሆን እንደሚገባ ተናግረዋል፡፡

    ዕውቅናው የተሰጣቸው ግንባር ቀደም ሰራተኞች ለእያንዳንዳቸው የ1500.00 ብር የታላቁ የኢትዮጵያ ሕዳሴ ግድብ ቦንድ እና የምስክር ወረቀት መሆኑን የፕሮግራሙ አዘጋጅ ኮሚቴ ሰብሳቢ ወ/ሮ ዝይን ገድሉ ተናግረዋል፡፡

   በመድረኩም የአዲስ ከተማ ክ/ከ/ የባህል ሙዚቃ ቡድን አዝናኝና አስተማሪ ጭውውቶች እና የተለያዩ ባህላዊ ውዝዋዜዎችን ያቀረበ ሲሆን ያነጋገርናቸው ግንባር ቀደም ሰራተኞች በፕሮግራሙ ደስተኞች እና ተነሳሽነታቸውን የሚጨምር መሆኑንም ለማወቅ ተችሏል፡፡

             በባህር ዳር እና በመቀሌ ከተሞች የህዝብ ክንፍ ስብሰባዎች ተካሄዱ

   በባህር ዳር እና በመቀሌ ከተሞች  የህዝብ ክንፍ ስብሰባዎች በርካታ ደንበኞች እና የህዝብ ክንፍ አካላት በተገኙበት ተካሄደ፡፡

     በባህርዳር ከተማ ግንቦት 25 ቀን 2009 ዓ.ም በግራንድ ሪዞርት ሆቴል ውይይቱ የተካሄደ ሲሆን የድርጅቱ የጥቅል የስራ ሂደት ስራ አስኪያጅ አቶ ሣሙኤል ባቱ በመጀመሪያው ውይይት ላይ ለተነሱ ማነቆዎች ምላሽ ይዘው ቀርበው ማብራሪያ ሰጥተዋል፡፡

    በመቀሌ ከተማ በዘማሪያስ ሆቴል ግንቦት 29 ቀን 2009 ዓ.ም በተካሄደው ስብሰባም የኢ.ኤም.ኤስ ስራ አስኪያጅ አቶ ሽመክት ሻውል ከዚህ ቀደም በተመሣሣይ ውይይት ላይ ለተነሱ ጥያቄዎች ምላሽ ይዘው ቀርበዋል፡፡

    በባህርዳር ውይይት ላይ ከጐንደር፣ ከደብረማርቆስ፣ ከባህርዳር እና ከደሴ ዞን የተወጣጡ ተሣታፊዎች እንዲሁም በመቀሌ ዞን ከሁሉም የትግራይ ክልል ዞኖች የተወከሉ ተቋማት እና ደንበኞች በውይይቱ ተሣታፊ ሆነዋል፡፡

    ተሣታፊዎች በተሰጠው ምላሽ እና አፈፃፀም እንደረኩ ገልፀዋል፡፡  በተያያዥነትም በአገልግሎት አሰጣጥ ላይ፣ በአገልግሎት መስጪያ ጣቢያዎች፣ ደንበኛ አያያዝን በተመለከተ፣ ካሣ አከፋፈልን በተመለከተ የመልዕክት ጥራትን አስመልክቶ፣  የገጠር የኮሙኒኬሽን ማዕከላትን አስመልክቶ ጥያቄዎች ተነስተዋል፡፡

   በተነሱት ሀሳቦች ላይ የሚመለከታቸው የዞን አመራሮች እና ሰብሣቢው የህግ የስራ ሂደት ቡድን መሪ አቶ ተካ ታመነ መልስ ሰጥተዋል፡፡ በተጨማሪም ህገወጥ አመላላሾችን በተመለከተ እንዴት መከላከል እንደሚቻል ማብራሪያ ሰጥተዋል፡፡

           የኢትዮጵያ ፖስታ አገልግሎት ድርጅት የፓስፖርት እደላ ስራ ጀመረ

    የኢትዮጵያ ፖስታ አገልግሎት ድርጅት እና ኢሚግሬሽንና የዜግነት ጉዳይ መምሪያ በኢትዮጵያ ፖስታ አገልግሎት በኩል ፓስፖርት ለማደል ስምምነት አደረጉ፣ ስራውም በይፋ ግንቦት 3 ቀን 2009 ዓ.ም በጠቅላይ ፖስታ ቤት ተጀምሯል፡፡

    የስምምነቱ ዋና አላማ ደንበኞች ጥራት ያለው እና ተደራሽ የሆነ አገልግሎት የሚያገኙበትን ሁኔታ የሚያመቻች ነው፡፡

    የኢሚግሬሽንና የዜግነት ጉዳይ መምሪያ መልካም አስተዳደርን ከማስፈን አኳያ ለዜጎች ተደራሽ፣ ምቹና በቴክኖሎጂ የተደገፈ ጥራት ያለው አገልግሎት ለመስጠት አሰራሩን ፈትሾ በርካታ የለውጥ ሥራዎችን በመሥራት ላይ የሚገኝ ሲሆን ተቋሙ የተቋቋመበት ዋና ዓላማ ፓስፖርት ማተም በመሆኑ የስርጭቱን ሥራ  በአገር ውስጥ አቅም የፈጠሩ የባለድርሻ አካላትን መጠቀም መጀመሩን   ዕደላውን በኢትዮጵያ ፖስታ አገልግሎት ድርጅት ማድረጉ አንዱ ማሳያ ነው፡፡

    የኢትዮጵያ ፖስታ አገልግሎት ድርጅት መልዕክት የመቀበል እና የማደል ስራ በአዋጅ የተሰጠው ተግባር እና ሀላፊነት በመሆኑ የዘርፉን ልምድ ያካበተ ድርጅት ነው፡፡ ለአብነትም ከውጭ ጉዳይ ሚኒስቴር፣ ከኢትዮጵያ ንግድ ባንክ፣ከኢትዮጵያ የህብረተሰብ ጤና ኢንስትቲዩት፣ ከከፍተኛ የትምህርት ተቋማት፣ ከመንግስት ኮሙኒኬሽን ጉዳዮች ጽ/ቤት፣ ከገቢዎችና ጉምሩክ ባለስልጣን፣ ከማህበራዊ ዋስትና ኤጀንሲ ለ200ሺ የጡረታ አበል ተከፋዮች የጡረታ አበል ክፍያ፣ በክብደት ላይ የተመሰረተ ዓመታዊ የተሽከርካሪ ፈቃድ ማደሻ ክፍያ የመሰብሰብ እና ከመሳሰሉት ተቋማት ጋር ለረጅም ጊዜ በመስራት ላይ ይገኛል፡፡

      ይህንን የፓስፖርት ዕደላ የተቀላጠፈ ለማድረግ ለስራው አስፈላጊ የሆኑ ቁሣቁሶችን እና የሰው ሀይል በማሟላት ስራ ጀምሯል፡፡

    በአሁኑ ሰዓት የፓስፖርት እደላው እየተካሄደ ያለው በአዲስ አበባ ከተማ በዋናው ፖስታ ቤት ሲሆን በቀጣይ ደረጃ በደረጃ በአዲስ አበባ ከተማ ውስጥ ለደንበኛው አመቺ በሆነ እና በተመረጡ የድርጅቱ አገልግሎት መስጪያ ጣቢያዎች ይከናወናል፡፡

     በሶስተኛ ደረጃም የኢሚግሬሽንና የዜግነት ጉዳይ መምሪያ ከአዲስ አበባ ውጪ ባሉት ስድስት ቅርንጫፍ ጽ/ቤቶች ማለትም በባህዳር፣ በመቀሌ፣ በሐዋሳ፣ በድሬዳዋ፣ በጅማ እና በደሴ በኩል የሚዘጋጁ ፓስፖርቶችን እደላ የማከናወን ስራ በተጠቀሱት ከተሞች ያከናውናል፡፡

     በአራተኛ ደረጃም  ወደ 19 ዞን ፖስታ ቤቶች በመውረድ በወረዳ እና በቀበሌ ደረጃ ባሉት የድርጅቱ የአገልግሎት መስጪያ ጣቢያዎች በዚያ በኩል የእደላው ስራውን በማከናወን በአቅራቢያቸው አገልግሎቱን እንዲያገኙ ለማድረግ ይሰራል፡፡

    ስራው እየተጠናከረ ሲሄድ ደንበኛው ባለበት በሞባይል ስልክ ፓስፖርቱን እንዲወስድ የማሳወቂያ አጭር መልዕክት በመላክ የእደላውን ስራ ይሰራል፡፡ የሀገሪቱም የአድራሻ ስርዓት ተግባራዊ ሲሆን የፓስፖርት እደላውን ቤት ለቤት ለማድረግ የረዥም ጊዜ እቅድ ተይዟል፡፡

    በአጠቃላይ በኢትዮጵያ ፖስታ አገልግሎት በኩል የፓስፖርት እደላው እንዲከናወን መደረጉ ከዚህ ቀደም ደንበኞች ይደርስባቸው የነበረውን ውጣ ውረድ ይቀንስላቸዋል፣አሰራሩን በቴክኖሎጂ በመደገፍ ለደንበኛው የተቀላጠፈ አሰራር ለመፍጠር ይረዳል፣በቅርበት አገልግሎቱን ማግኘት የሚችሉበትን መንገድ ይፈጥራል፡፡

የፓስፖርት እደላው በተሳካ መልኩ እንዲከናወንም ከሁለቱም ተቋማት የተወጣጡ የጋራ ኮሚቴዎች ተዋቅረው ለዝግጅት ምዕራፍ አስፈላጊ የሆኑ ተግባራት አከናውነዋል፡፡

በፖስታ አገልግሎት በኩል የሰው ሀይል ቅጥር ተካሂዷል፣ በመልዕክት እደላ ላይ ሰራተኞች እንዲመደቡ ተደርጓል፡፡

 ከዚህ በተጨማሪም የመልዕክት ዕደላው የሚከናወንበት ቢሮዎች የማዘጋጀት ስራ ተሰርቷል፡፡

አሰራሩንም ኮምፒውተራይዝ ለማድረግ ፖስት ግሎባልን የማዘመን ስራ ተሰርቷል፡፡

በስራው ተሳታፊ ለሚሆኑ ሰራተኞች ስልጠና ተሰጥቷል፡፡

አሰራሩን በተመለከተም መመሪያ እንዲዘጋጅ ተደርጓል፡፡

ስራው ከተጀመረ በኋላ ለሚከሰቱ ችግሮች መፍትሄ የሚያመጣ፣ ችግሮችን ተከታትሎ የሚፈታ እንዲሁም የቅብብሎሽ ስራው የሰመረ እንዲሆን የሚያደርግ ከሁለቱም ተቋማት የተወጣጣ ኮሚቴ ተቋቁሟል፡፡  

የብሔር፣ብሔረሰቦችና ሕዝቦች ቀን በዓል ተከበረ

በመላው ሀገሪቱ ለ11ኛ ጊዜ እና በዋናነት በሐረሪ ክልል እየተከበረ ያለው የብ/ብ/ሰቦችና ህዝቦች ቀን በዓልን በተመለከተ የኢትዮጵያ ፖስታ አገልግሎት ድርጅት ሰራተኞች “ህገመንግስታችን፣ ለዴሞክራሲያዊ አንድነታችንና ለህዳሴ ያችን” በሚል መሪ ቃል በዕለቱ ሐምሌ 29 ቀን 2009 ዓ.ም በድርጅቱ የስብሰባ አዳራሽ በፓናል ውይይት በድምቀት አከበሩ፡፡

     በዕለቱም የድርጅቱ የድጋፍ ሰጪ ዘርፍ ስራ አስፈፃሚ አቶ ታደለ አሰፋ “ህገ መንግስት፣ ብዝሃነትና ዴሞክራሲያዊ አንድነት” በሚል ርዕስ የተዘጋጀውን ሰነድ ለፓናል ውይይት አቅርበዋል፡፡ 

     በውይይቱም የኢ.ፌዲሪ ህገ መንግስት ዋና ዋና ባህሪያትን፣ ህገ መንግስትና ብዝሃነት፣ የብዝሃነት ጥያቄዎችና አያያዛቸው፣ ስኬቶች፣ ያጋጠሙ ተግዳሮቶችና ቀጣይ አቅጣጫዎችን አስመልክቶ በቀረበው ሰነድ ላይ በስፋት ውይይት ተካሄዶባቸዋል፡፡

    በበዓሉም የሻማ ማብራትና የዳቦ ቆረሳ ስነ-ስርዓት በአቶ ታደለ አሰፋ እና በመሰረታዊ ሰራተኞች ማህበር ሊቀመንበር ወ/ሮ ዝናሽ አሰፋ የተከናወነ ሲሆን የጥያቄና መልስ ውድድር ስነስርአት ተካሂዶ ለተወዳዳሪዎችም ሽልማት ተበርክቷል፡፡  

2011. Custom text here
Joomla 1.7 templates free by Joomla Template Maker and Free Joomla Templates