Home

Advertisement

we deliver small

ፖስታ ዜናዎች

  

ለድርጅቱ የግንባር ቀደም ሰራተኞች የዕውቅና
መስጠትፕሮግራም ተካሄደ

በ2009 በጀት ዓመት በተሰማሩበት የስራ ዘርፍ እና በተደራጁበት የ1ለ5 አደረጃጀት የላቀ የአፈፃፀም ውጤት ያስመዘገቡ ሰራተኞች የዕውቅናና የሽልማት አሰጣጥ ፕሮግራም የተካሄደው ጥር 27 ቀን 2010 ዓ.ም ሲሆን ከአጠቃላይ 1051 የአንድ ለአምስት አደረጃጀቶች ግንባር ቀደም ፈፃሚ ሆነው የተመረጡ 401 ሰራተኞች ተሸላሚ ሆነዋል፡፡

     በዕውቅና አሰጣጥ ፕሮግራሙ ላይ በመገኘት መልዕክት ያስተላለፉት የድርጅቱ ዋና ስራ አስኪያጅ አቶ ግደይ ገ/ዮሐንስ እንደ ተናገሩት በድርጅቱ ያለው የለውጥ ሰራዊት ግንባታ ሂደት ከ1ለ5 እስከ ኮማንድ ፖስት ያለውን አደረጃጀት የተከተለ መሆኑን ጠቁመው በለውጥ እንቅስቃሴው ውስጥ የግንባር ቀደም ሰራተኞች ሚና ከፍተኛ ነው ብለዋል፡፡

     ግንባር ቀደም ሠራተኛ በአመለካከቱ፣ በክህሎቱ፣ በስነምግባሩ፣ በስራ አፈፃፀም፣ በፀረ ኪራይ ሰብሳቢነት አቋሙና ትግሉ፣ በተባባሪነቱ፣ በስራ ተነሳሽነቱ ወዘተ ከሌሎች ሰራተኞች የተሻለ አፈፃፀም ያስመዘገበ መሆኑን ጠቁመው በቀጣይነትም ድርጅቱ ለሚያስመዘግባቸው ስኬቶች የግንባር ቀደሞች ሚና ተጠናክሮ ይቀጥላል ብለዋል፡፡

       የግንባር ቀደም ሰራተኞች የዕውቅና አሰጣጥ ፕሮግራምን በማስመልከት የሪፎርም ድጋፍና ክትትል የስራ ሂደት ባለቤት አቶ ትካቦ ረዳ በበኩላቸው ግንባር ቀደም ሰራተኞች የዕውቅና አሰጣጥ ሂደት ከ2006 ዓ.ም ጀምሮ እየተተገበረ የሚገኝ መሆኑን ጠቁመው ለዚሁ ፕሮግራም ድርጅቱ ከፍተኛ ትኩረት በመስጠት ከአንድ ሚሊዮን ብር በላይ ወጪ ማድረጉን ጠቁመው የግንባር ቀደም ፈፃሚ ሰራተኞችን የመሸለሙ ሂደት ለሰራተኞች ከፍተኛ ተነሳሽነትና የባለቤትነት ስሜት መጎልበት ብሎም በርካታ ግንባር ቀደሞችን ለማፍራት አይነተኛ ሚና ስለሚኖረው ተጠናክሮ ይቀጥላል ብለዋል፡፡

       በዕለቱም ለግንባር ቀደም ሰራተኞች የዕውቅናና የምሰክር ወረቀት በድርጅቱ ዋና ሥራ አስኪያጅ አቶ ግደይ ገ/ዮሐንስ የተበረከተላቸው ሲሆን ሥነ ሥርዓቱ ከአዲስ አበባ ከተማ ውጪ ባሉ በአስራ ሰባቱም ዞን ፖስታ ቤቶች በተመሳሳይ ሁኔታ ተከናውነኗል፡፡  

ለድርጅቱ አገልግሎት መሻሻል የህዝብ ክንፉ መድረክ ጠቃሚ እንደሆነ ተገለጸ

   የኢትዮጵያ ፖስታ አገልግሎት ድርጀት ከደንበኞችና ከህዝብ ክንፍ መድረክ ጋር የሚያካሂዳቸው የውይይት መድረኮች አገልግሎቱን ለማሻሻል ከፍተኛ ጠቀሜታ እንዳላቸው ተገለፀ፡፡

     የኢትዮጵያ ፖስታ አገልግሎ ት ድርጅት በአገ ልግሎት አሰጣ ጡ ላይ ያሉ ችግሮችን ለመቅረፍ በአዲስ አበባ ከተማ እና ከአዲስ አበባ ከተማ ውጪ በአምስት ዋና ዋና የክልል ከተሞች አስራ ሁለት የህዝብ ክንፍ የውይይት መድረክ ለማከናወን ያቀደ ሲሆን፤ የዚሁ የውይይት ዕቅድ አካል የሆነው መድረክ በባህር ዳር ከተማ ጥር 24 ቀን 2010 ዓ.ም በሆም ላንድ ሆቴል ተካሂዷል፡፡

     በውይይቱም ከ100 በላይ የሚሆኑ የባህዳር ዞን ፣ የደብረማርቆስ ዞን ፣ የጎንደር ዞን እና የደሴ ዞን ደንበኞች እና በተለያየ ደረጃ ያሉ የህብረተሰብ ክፍሎችን ሊወክሉ የሚችሉ የህዝብ ከንፍ አካለት ተገኝተዋል፡፡

     በውይይቱ ላይ የድርጅቱ የኮሙኒኬሽን የስራ ሂደት ቺፍ ኦፊሰር ወ/ሮ ዝይን ገድሉ ከዚህ ቀደም በመድረኩ የተነሱ ጥያቄዎች ምላሽ እና የ2010 በጀት ዓመት የመጀመሪያ ስድስት ወራት የድርጅቱ ዕቅድ ክንውንን አቅርበዋል፡፡               ደንበኞችም በተነሱት ጉዳዮች ላይ እና በአገልግሎት አሰጣጡ ላይ ሀሳባቸውን የሰጡ ሲሆን ከተነሱት ሀሳቦችም የገጠር የመገናኛ ማዕከላት ማስፋፋትና የማጠናከር ሥራን፣ የጋዜጣ ስርጭት እና ጥንቃቄን፣ የአገልግሎት መስጪያ ጣቢያዎችን፣ ግንባታዎችን፣ ህገወጥ አመላላሾችን፣ የመልዕክት መዘግየትን በተመለከተ እና መሰል ገንቢ ሃሣቦች አንስተዋል፡፡

     በማጠቃለያውም ወ/ሮ ዝይን ለተነሱት ሀሳቦች የሚመለከታቸው የስራ ሂደቶች የድርጊት መርሃ ግብር አዘጋጅተው ከአጭር፣ ከመካከለኛ እና ከረዥም ጊዜ አኳያ በታቀደ ሁኔታ ወደተግባር እንደሚገቡ እና ስለአፈፃፀሙም ለቀጣዩ መድረክ ምላሽ ተይዞ እንደሚቀርብ ተናግረዋል፡፡

የድርጅቱ መሠረታዊ የሰራተኛ ማህበር የስራ አስፈፀሚ ምርጫ ተካሄደ

     የኢትዮጵያ ፖስታ አገልግሎት ድርጅት መሰረታዊ የሰራተኛ ማህበር ስራ አስፈፃሚ እና የኦዲት ኮሚቴ የአራት ዓመት የስራ ዘመኑን በማጠናቀቁ ለቀጣዩ አራት ዓመታት የሚያገለግሉ ዘጠኝ ስራ አስፈፃሚ እና ሶስት የኦዲት ኮሚቴ ጥር 29 ቀን 2010 ዓ.ም የማህበሩ አባላት በድርጅቱ ዋና መስሪያ ቤት የስብሰባ አዳራሽ ምርጫ አካሄደ፡፡

       ስነ-ስርዓቱን የመሩት የክብር እንግዳ የትራንስፖርትና መገናኛ ሰራተኛ ማህበራት ኢንዱስትሪ ፌዴሬሽን ፕሬዝዳንት ተወካይ የሆኑት ወ/ሮ አምሳለ ገ/ሰንበት ሲሆኑ የድርጅቱ መሰረታዊ ሰራተኛ ማህበር አመራር ላለፉት አራት ዓመታት ከድርጅቱ አመራር እና ከሌሎችም ባለድርሻ አካላት በነበረው ጠንካራ ግንኙነት ውጤታማ ጊዜን ያሳለፈ አመራር መሆኑን ገልፀው በህገ ደንቡ መሰረት አመራሩ በየአራት ዓመቱ ምርጫ ማካሄዱ ተገቢ መሆኑን ገልፀዋል፡፡

     በዕለቱም የመሠረታዊ ሠራተኛ ማህበሩ ሊቀመንበር ወ/ሮ ዝናሽ አሰፋ ያለፉት አራት ዓመታት የስራ አፈፃፀም ሪፖርታቸውንም አቅርበዋል፡፡ በሪፖርቱም የድርጅቱን ራዕይና ተልእኮ ለማሣካት በየደረጃው ያለው ሰራተኛ እጅ ለእጅ ተያይዞ ወደላቀ ደረጃ በማድረስ ተጠቃሚነቱን ለማረጋገጥ ሁሉም በአቅሙ ሃላፊነቱን ሲወጣ የነበረ መሆኑን ጠቅሰዋል፡፡እንዲሁም በሁለቱም ወገን መካከል ፍትሐዊ እና ውጤታማ የህብረት ስምምነት በመደራደርና በድርድሩም መሰረት ምርትና ምርታማነትን በማሳደግ በሃገሪቱ ማህበራዊ፣ ፖለቲካዊ እና ኢኮኖሚያዊ ለውጥ ዘርፍ ግዴታውን እየተወጣ በተሳትፎውም የስራ ዋስትና እንዲረጋገጥ ብሎም መብትና ጥቅሙ በህጉ አግባብ እንዲጠበቅ ተቀዳሚ ሚናውን ተወጥቷል ብለዋል፡፡

       እንዲሁም ህገ ደንብን ስራ ላይ በማዋል፣ የዞን ዘርፍ ተጠሪዎችን የማቋቋም እና አቅምን የማጐልበት፣ ከድርጅቱ ጋር የህብረት ስምምነት በተሻለ ሁኔታ የመደራደርና የኢንዱስትሪ ሰላም የማስፈን ስራ፣ የሰራተኞች ክበብ ማጠናከርና አገልግሎቱን የማሻሻል፣ ዓመታዊ የደሞዝ ጭማሪ፣ ማበረታቻ እና ቅምሻ በወቅቱ የማስፈፀም፣ ከድርጀቱ፣ ከፌዴሬሽን፣ ከኢሰማኮ እና ከኢፌዲሪ ሰራተኛና ማህበራዊ ጉዳይ ሚኒስቴር ጋር ሰላማዊ የኢንዱስትሪ ግንኙነት በመፍጠር ውጤታማ ጊዜያትን ያሳለፈ መሆኑን ወ/ሮ ዝናሽ በሪፖርታቸው ጠቅሰዋል፡፡

     በተጨማሪም በአፈፃፀም ያጋጠሙ ችግሮች፣ ጠንካራና ደካማ ጐኖችን ያቀረቡ ሲሆን የኦዲት ኮሚቴውም የማህበሩንና አጠቃላይ የክበቡን ገንዘብ የሂሳብ ምርመራ ሪፖርት ያጋጠሙ ችግሮች፣ ጠንካራ ና ደካማ እንዲሁም ቀጣይ አቅጣጫዎችን በመጠቆም አቅርቧል፡፡

በተለይም በቀረቡት የስራ አስፈፃሚ እና የኦዲት ኮሚቴ ሪፖርት ላይ ሰፋ ያለ ውይይት የተካሄደ ሲሆን በቀጣይ ማህበሩን ሊመሩ የሚችሉ ዘጠኝ የስራ አስፈፃሚ እና ሶስት የኦዲት ኮሚቴ አባላትም ተመርጠዋል፡፡

የብሔር፣ብሔረሰቦችና ሕዝቦች ቀን በዓል ተከበረ

በመላው ሀገሪቱ ለ11ኛ ጊዜ እና በዋናነት በሐረሪ ክልል እየተከበረ ያለው የብ/ብ/ሰቦችና ህዝቦች ቀን በዓልን በተመለከተ የኢትዮጵያ ፖስታ አገልግሎት ድርጅት ሰራተኞች “ህገመንግስታችን፣ ለዴሞክራሲያዊ አንድነታችንና ለህዳሴ ያችን” በሚል መሪ ቃል በዕለቱ ሐምሌ 29 ቀን 2009 ዓ.ም በድርጅቱ የስብሰባ አዳራሽ በፓናል ውይይት በድምቀት አከበሩ፡፡

     በዕለቱም የድርጅቱ የድጋፍ ሰጪ ዘርፍ ስራ አስፈፃሚ አቶ ታደለ አሰፋ “ህገ መንግስት፣ ብዝሃነትና ዴሞክራሲያዊ አንድነት” በሚል ርዕስ የተዘጋጀውን ሰነድ ለፓናል ውይይት አቅርበዋል፡፡ 

     በውይይቱም የኢ.ፌዲሪ ህገ መንግስት ዋና ዋና ባህሪያትን፣ ህገ መንግስትና ብዝሃነት፣ የብዝሃነት ጥያቄዎችና አያያዛቸው፣ ስኬቶች፣ ያጋጠሙ ተግዳሮቶችና ቀጣይ አቅጣጫዎችን አስመልክቶ በቀረበው ሰነድ ላይ በስፋት ውይይት ተካሄዶባቸዋል፡፡

    በበዓሉም የሻማ ማብራትና የዳቦ ቆረሳ ስነ-ስርዓት በአቶ ታደለ አሰፋ እና በመሰረታዊ ሰራተኞች ማህበር ሊቀመንበር ወ/ሮ ዝናሽ አሰፋ የተከናወነ ሲሆን የጥያቄና መልስ ውድድር ስነስርአት ተካሂዶ ለተወዳዳሪዎችም ሽልማት ተበርክቷል፡፡  

2011. Custom text here
Joomla 1.7 templates free by Joomla Template Maker and Free Joomla Templates